ഐഡിബിഐ ബാങ്കിൽ 676 ഒഴിവ്. ജൂണിയർ അസിസ്റ്റന്‍റ് മാനേജർ ഗ്രേഡ് ഒ തസ്തികയിലാണ് അവസരം. മേയ് 20 വരെ ഓൺലൈനിൽ അപേക്ഷിക്കാം. യോഗ്യത: 60 % മാർക്കോടെ (പട്ടികവിഭാഗം, ഭിന്നശേഷിക്കാർക്ക് 55% മാർക്ക്) ഏതെങ്കിലും വിഷയത്തിൽ ബിരുദം. കംപ്യൂട്ടർ പരിജ്ഞ‌ാനം വേണം. പ്രാദേശികഭാഷ അറിയുന്നവർക്കു മുൻഗണന.
പ്രായം: 20-25. പട്ടികവിഭാഗത്തിന് അഞ്ചും ഒബിസിക്കു മൂന്നും ഭിന്നശേഷിക്കാർക്കു പത്തും വർഷം ഉയർന്ന പ്രായത്തിൽ ഇളവ്. വിമുക്തഭടന്മാർക്കും ഇളവുണ്ട്. യോഗ്യത, പ്രായം എന്നിവ 2025 മേയ് ഒന്ന് അടിസ്ഥാനമാക്കി കണക്കാക്കും. തെരഞ്ഞെടുപ്പ്: ഓൺലൈൻ ടെസ്റ്റ‌ിന്‍റെ അടിസ്ഥാനത്തിലാണു പ്രാഥമിക തെരഞ്ഞെടുപ്പ്.
ഇന്‍റർവ്യൂവും ഉണ്ടാകും. ഓൺലൈൻ ടെസ്റ്റ് ജൂൺ 8നു നടക്കും. ലോജിക്കൽ റീസണിംഗ്, ഡേറ്റ അനാലിസിസ് ആൻഡ് ഇന്‍റർപ്രട്ടേഷൻ, ഇംഗ്ലീഷ് ലാംഗ്വേജ്, ക്വാണ്ടിറ്റേറ്റീവ് ആപ്റ്റിറ്റ്യൂഡ്, ജനറൽ/ഇക്കോണമി/ബാങ്കിംഗ് അവയർനെസ്/കംപ്യൂട്ടർ/ഐടി എന്നിവ ഉൾപ്പെടുന്നതാണു പരീക്ഷ. ആലപ്പുഴ, കണ്ണൂർ, കൊച്ചി, കൊല്ലം, കോട്ടയം, കോഴിക്കോട്, മലപ്പുറം, പാലക്കാട്, തിരുവനന്തപുരം, തൃശൂർ എന്നിവിടങ്ങളിൽ പരീക്ഷാകേന്ദ്രമുണ്ട്.
കൂടുതൽ വിവരങ്ങൾ വെബ്സൈറ്റിൽ. ഫീസ്: 1050 രൂപ (പട്ടികവിഭാഗം/ഭിന്നശേഷിക്കാർക്ക് 250). ഓൺലൈനിൽ അടയ്ക്കാം. വിജ്‌ഞാപനത്തിനും ഓൺലൈൻ രജിസ്ട്രേഷനും: www.idbibank.in