ADVERTISEMENT

ADVERTISEMENT

ഫാ. ജസ്റ്റിൻ മൂന്നനാലിനു സ്വീകരണം നൽകി

പുൽപ്പള്ളി: ജീവകാരുണ്യ രംഗത്ത് മാതൃകയായ മുള്ളൻകൊല്ലി സെന്‍റ് മേരീസ് ഫൊറോന വികാരി ഫാ.ജസ്റ്റിൻ മൂന്നനാലിന് വയനാട് യൂത്ത് സർവീസ് ഓർഗനൈസേഷന്‍റെ നേതൃത്വത്തിൽ സ്വീകരണം നൽകി.

ഡോ.കെ.പി. സാജു ഉദ്ഘാടനം ചെയ്തു. ഫാ.റിജോസ് അരുമായിൽ, ജസ്റ്റസ് തൈപ്പറന്പിൽ, തോമാച്ചൻ കടുപ്പിൽ, റിജു മിറ്റത്താനി, ജോസ് തൊട്ടിയിൽ എന്നിവർ പ്രസംഗിച്ചു.

ADVERTISEMENT

ഫാ. ജയിംസ് പുത്തൻപറന്പിലിനെ ആദരിച്ചു

പുൽപ്പള്ളി: കാർഷിക പ്രശ്നങ്ങളിൽ ശ്രദ്ധേയമായ ഇടപെടൽ നടത്തുന്ന മരകാവ് സെന്‍റ് തോമസ് പള്ളി വികാരി ഫാ. ജയിംസ് പുത്തൻപറന്പിലിനെ വയനാട് സിറ്റി ക്ലബ് ആദരിച്ചു. പ്രസിഡന്‍റ് ബെന്നി മാത്യു പൊന്നാട അണിയിച്ചു. ഡോ.കെ.പി. സാജു, വിൽസണ്‍ മാളിയേക്കൽ, റോബർട്ട് കാട്ടാംകോട്ടിൽ, ജോയി ചിമ്മിനിക്കാട്ട് എന്നിവർ പ്രസംഗിച്ചു.

‘താമരശേരി ചുരത്തിലെ ഗതാഗതക്കരുക്കിന് ശാശ്വത പരിഹാരം കാണണം’

കൽപ്പറ്റ: താമരശേരി ചുരത്തിൽ ആവർത്തിക്കുന്ന ഗതാഗതക്കുരുക്കിന് ശാശ്വത പരിഹാരം കാണണമെന്ന് കോണ്‍ഗ്രസ് വൈത്തിരി ബ്ലോക്ക് കമ്മിറ്റി പ്രസിഡന്‍റ് പോൾസണ്‍ കൂവയ്ക്കൽ സർക്കാരിനോട് ആവശ്യപ്പെട്ടു. അത്യാസന്ന നിലയിൽ വയനാട്ടിൽനിന്നു കോഴിക്കോട്ടെ വിവിധ ആശുപത്രികളിലേക്ക് കൊണ്ടുപോയ രോഗികളിൽ ചലരുടെ ജീവൻ നഷ്ടപ്പെടാൻപോലും ചുരത്തിൽ പലപ്പോഴും ഉണ്ടാകുന്ന ഗതാഗത തടസം കാരണമാകുകയാണ്. എന്നിട്ടും ഉത്തരവാദപ്പെട്ടവർ അനങ്ങാപ്പാറ നയം തുടരുകയാണ്. ചുരം റോഡിലൂടെ മൾട്ടി ആക്സിൽ ബസും ട്രക്കും ഉൾപ്പെടെ ആയിരക്കണക്കിനു വാഹനങ്ങളാണ് പ്രതിദിനം കടന്നുപോകുന്നത്. ചില ദിവസങ്ങളിൽ മണിക്കൂറുകൾ നീളുന്ന ഗതാഗത തടസമാണ് ചുരത്തിൽ ഉണ്ടാകുന്നത്. ബദൽ റോഡുകളിൽ ഒന്നെങ്കിലും യാഥാർഥ്യമായാൽ ഈ അവസ്ഥയ്ക്കു മാറ്റമാകും. ചിപ്പിലിത്തോട്-മരുതിലാവ്-തളിപ്പുഴ, പടിഞ്ഞാറത്തറ-പൂഴിത്തോട് ബദൽ റോഡുകൾ നിർമിക്കുന്നത് വയനാടിന് ഏറെ ഗുണം ചെയ്യുന്നതാണ്. 1994ൽ ആരംഭിച്ച പടിഞ്ഞാറത്തറ-പൂഴിത്തോട് റോഡ് നിർമാണം ഇതുവരെ പൂർത്തിയായില്ല. പ്രവൃത്തിക്ക് വനഭൂമി ഉപയോഗപ്പെടുത്തുന്നതിന് കേന്ദ്രാനുമതി ലഭിക്കാത്തതാണ് ഈ റോഡ് പദ്ധതിക്ക് വിനയായത്. 500 കോടി രൂപ ചെലവിൽ പൂർത്തിയാക്കാവുന്ന ചിപ്പിലിത്തോട്-മരുതിലാവ്-തളിപ്പുഴ റോഡിന്‍റെ കാര്യത്തിൽ സർക്കാർ മൗനത്തിലാണ്. ഇത് ദൗർഭാഗ്യകരമാണെന്നും പോൾസണ്‍ കൂവയ്ക്കൽ പറഞ്ഞു.

എൽസ്റ്റൻ എസ്റ്റേറ്റ്: കോടതിയെ വീണ്ടും സമീപിക്കാൻ അഡ്വ.ജനറലിന് നിർദേശം

കൽപ്പറ്റ: വയനാട് പുഞ്ചിരിമട്ടം ഉരുൾ ദുരന്തബാധിതർക്ക് ഭവന പദ്ധതി നടപ്പാക്കുന്നതിന് കൽപ്പറ്റയ്ക്കു സമീപം ഏറ്റെടുത്ത എൽസ്റ്റൻ എസ്റ്റേറ്റിലെ തൊഴിലാളികൾക്ക് ആനുകൂല്യങ്ങൾ വേഗത്തിൽ ലഭ്യമാക്കുന്നതിന് കോടതിയെ വീണ്ടും സമീപിക്കാൻ അഡ്വക്കറ്റ് ജനറലിന് സർക്കാർ നിർദേശം. റവന്യു മന്ത്രി കെ. രാജൻ, പൊതുവിദ്യാഭ്യാസ-തൊഴിൽ മന്ത്രി വി. ശിവൻകുട്ടി, പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു, അഡീഷണൽ ലേബർ കമ്മീഷണർ(ഐആർ)കെ.എം. സുനിൽ എന്നിവരും ഓണ്‍ലൈനിൽ ജില്ലാ കളക്ടർ ഡി.ആർ. മേഘശ്രീയും പങ്കെടുത്ത യോഗത്തിലെ തീരുമാനം അനുസരിച്ചാണ് നിർദേശം. പല ഇനങ്ങളിലായി 5,97,53,793 രൂപ തൊഴിലാളികൾക്ക് നൽകാനുണ്ടെന്നും ഇതിന്‍റെ റവന്യു റിക്കവറി നടക്കുകയാണെന്നും എജി കോടതിയെ അറിയിച്ചിട്ടുണ്ട്. വേതനം, ഗ്രാറ്റുവിറ്റി തുടങ്ങിയവ ഉൾപ്പെടെ കുടിശിക സംബന്ധിച്ച കണക്ക് ബന്ധപ്പെട്ട വകുപ്പ് ശേഖരിച്ചുവരികയാണെന്നും ബോധിപ്പിച്ചു. എസ്റ്റേറ്റ് മാനേജ്മെന്‍റിന് നഷ്ടപരിഹാരമായി കോടതി നിർദേശിച്ച തുക രണ്ട് ഘട്ടങ്ങളായി സർക്കാർ കെട്ടിവച്ചിട്ടുണ്ട്. ഈ തുക എങ്ങനെ വിതരണം ചെയ്യണമെന്നതിൽ നിർദേശം കോടതി നൽകിയിട്ടില്ല. തൊഴിലാളികൾക്ക് ലഭിക്കേണ്ട ആനുകൂല്യം സർക്കാർ അടച്ച തുകയിൽ നിന്ന് ലഭ്യമാക്കുന്നതിന് കോടതിയിൽ സത്യവാങ്മൂലം നൽകിയിട്ടുണ്ട്. ഇക്കാര്യം കോടതിയുടെ ശ്രദ്ധയിൽ വീണ്ടും കൊണ്ടുവരാനാണ് എജിക്ക് നിർദേശം. 2015 ഫെബ്രുവരി മുതൽ 2024 ഡിസംബർ വരെ പിഎഫ് കുടിശിക 2,73,43,304 രൂപയും ഇതിനു പ്രൊവിഡന്‍റ് ഫണ്ട് കമ്മീഷണർ നിർദേശിക്കുന്ന പിഴപ്പലിശയും 2023-24, 2024-25 വർഷങ്ങളിലെ ബോണസ് 4,43,995 രൂപയും 2022, 2023, 2024 വർഷങ്ങളിലെ ആന്വൽ ലീവ് സറണ്ടർ ആനുകൂല്യമായി 14,20,591 രൂപയും 2019, 2023 വർഷങ്ങളിലെ സാലറി അരിയർ 4,46,382 രൂപയും പ്രൊവിഡന്‍റ് ഫണ്ടിൽ അധികമായി ഈടാക്കിയ 7,21,240 രൂപയും തൊഴിലാളികളുടെയും സൂപ്പർവൈസർമാരുടെയും നാലു മാസത്തെ വേതന കുടിശിക 17,93,087 രൂപയും ആറു വർഷത്തെ വെതർ പ്രൊട്ടക്ടീവ് ആനുകൂല്യമായി പ്രതിവർഷം 350 രൂപ നിരക്കിൽ 3,25,500 രൂപയും ഡെപ്യൂട്ടി ലേബർ കമ്മീഷണറുടെ ഉത്തരവിൽ ഉൾപ്പെട്ടതടക്കം 150 തൊഴിലാളികളുടെ ഗ്രാറ്റുവിറ്റി 2,35,09,300 രൂപയും അണ്‍ക്ലയിംഡ് ഡ്യൂസ് 33,67,409 രൂപയും തൊഴിലാളികൾക്ക് കിട്ടാനുണ്ട്. ഈ തുക നൽകുമെന്ന് അഡീഷണൽ ലേബർ കമ്മീഷണറുടെ (ഐആർ) അധ്യക്ഷതയിൽ ജില്ലാ ലേബർ ഓഫീസിൽ ചേർന്ന യോഗത്തിൽ മാനേജ്മെന്‍റ് സമ്മതിച്ചിരുന്നു.

പിതാവിനു മർദനമേറ്റ കേസിൽ നീതി കിട്ടുന്നില്ലെന്ന് മകൾ

കൽപ്പറ്റ: കുപ്പാടിത്തറ ശ്യാം നിവാസിൽ പി.സി. ജയ്സൺ(49)ഈസ്റ്റർ ദിനം വൈകുന്നേരം മർദനമേറ്റതുമായി ബന്ധപ്പെട്ട കേസിൽ പോലീസിൽനിന്നു നീതി ലഭിക്കുന്നില്ലെന്ന് മകൾ പി.ജെ. അക്സ വാർത്താസമ്മേളനത്തിൽ പറഞ്ഞു. മർദനമേറ്റതിനെത്തുടർന്ന് പിതാവിന്‍റെ ചെറുകുടലിന്‍റെ 10 സെന്‍റിമീറ്റർ നീക്കം ചെയ്യേണ്ടിവന്നിട്ടും ശക്തമായ വകുപ്പുകൾ പ്രകാരം കേസെടുക്കാനും പ്രതികളെ അറസ്റ്റുചെയ്യാനും പോലീസ് തയാറാകുന്നില്ലെന്ന് അവർ ആരോപിച്ചു. കുപ്പാടിത്തറയ്ക്കു സമീപം പുഴയോരത്ത് അയൽവാസികളായ നാലുപേരാണ് ജയ്സണനെ മർദിച്ചത്. പിറ്റേന്ന് കോഴിക്കോട് മെഡിക്കൽ കോളജ് ആശുപത്രിയിൽ അടിയന്തര ശസ്ത്രക്രിയയിലൂടെയാണ് ചെറുകുടലിന്‍റെ ഭാഗം നീക്കം ചെയ്തത്. മർദനവുമായി ബന്ധപ്പെട്ട് ഏപ്രിൽ 24നാണ് പടിഞ്ഞാറത്തറ പോലീസിൽ പരാതി നൽകിയത്. മേയ് അഞ്ചിന് പോലീസ് സ്റ്റേഷനിൽനിന്നു എഫ്ഐആറിന്‍റെ പകർപ്പ് ലഭിച്ചു. നിസാര വകുപ്പുകൾ പ്രകാരമാണ് കേസെന്നാണ് പ്രഥമ വിവര റിപ്പോർട്ടിൽനിന്നു മനസിലായതെന്ന് മകൾ പറഞ്ഞു.

മുള്ളൻകൊല്ലി മണ്ഡലം കോണ്‍ഗ്രസ് പ്രസിഡന്‍റ് രാജിവയ്ക്കണം: ഡികെടിഎഫ്

പുൽപ്പള്ളി: ദളിത് സ്ത്രീ വിരുദ്ധ പരാമർശം നടത്തിയ കോണ്‍ഗ്രസ് മുള്ളൻകൊല്ലി മണ്ഡലം പ്രസിഡന്‍റ് രാജിവയ്ക്കണമെന്ന് ദേശീയ കർഷക തൊഴിലാളി ഫെഡറേഷൻ (ഡികെടിഎഫ്) മണ്ഡലം കമ്മിറ്റി ആവശ്യപ്പെട്ടു. രൂക്ഷമായ പ്രതിസന്ധിയാണ് മുള്ളൻകൊല്ലിയിലെ കോണ്‍ഗ്രസ് നേരിടുന്നത്. പാർട്ടിയേയും പ്രവർത്തകരേയും ഒന്നിച്ചുകൊണ്ടുപോകുന്നതിൽ മണ്ഡലം പ്രസിഡന്‍റ് പരാജയപ്പെട്ടിരിക്കുകയാണ്. പാർട്ടിയിൽ ഒരു ബൂത്ത് കമ്മിറ്റി ഭാരവാഹിപോലുമല്ലാതിരുന്നയാളെ ഡിസിസി പ്രസിഡന്‍റുമായുള്ള ബന്ധുത്വം യോഗ്യതയാക്കിയാണ് മണ്ഡലം പ്രസിഡന്‍റായും മുള്ളൻകൊല്ലി ബാങ്ക് പ്രസിഡന്‍റായുമെല്ലാം തെരഞ്ഞെടുത്തത്. മുള്ളൻകൊല്ലിയിലെ ഒട്ടുമിക്ക ബൂത്തുകമ്മിറ്റികളും നിർജീവമാണ്. ചില വാർഡുകളിലും ബൂത്തുകളിലും മണ്ഡലം പ്രസിഡന്‍റിനെ കാലുകുത്താൻപോലും പ്രവർത്തകർ അനുവദിച്ചിട്ടില്ല. ദളിത് സ്ത്രീ വിരുദ്ധ പരാമർശം നടത്തിയ കേസിൽ കുറ്റാരോപിതനെ സംരക്ഷിക്കാൻ പാർട്ടി നേതൃത്വത്തിലെ ചിലർ പോലീസിനെ സ്വാധീനിക്കാൻ ശ്രമിക്കുന്നുണ്ട്. മണ്ഡലം പ്രസിഡന്‍റിനെ മാറ്റണമെന്നാവശ്യപ്പെട്ട് ഭൂരിപക്ഷം പ്രവർത്തകരും ഒപ്പിട്ട് കെപിസിസി നേതൃത്വത്തിന് പരാതി നൽകിയിട്ടും നടപടിയെടുക്കാത്തത് പ്രവർത്തകരോടുള്ള വെല്ലുവിളിയാണ്. തദ്ദേശതെരഞ്ഞെടുപ്പ് അടുത്തിരിക്കേ ഈ വിഷയത്തിൽ നേതൃത്വത്തിന്‍റെ ഇടപെടലുണ്ടായില്ലെങ്കിൽ പാർട്ടിക്ക് ദോഷംചെയ്യും. മണ്ഡലം പ്രസിഡന്‍റിനെതിരായ നടപടി വൈകിയാൽ ഡികെടിഎഫ് പരസ്യപ്രതിഷേധത്തിലേക്ക് കടക്കും. മണ്ഡലം പ്രസിഡന്‍റ് സി.ഡി. തങ്കച്ചൻ അധ്യക്ഷത വഹിച്ചു. ശിവരാമൻ പാറക്കുഴി, മാത്യു ഉണ്ണിയാപ്പള്ളി, ജോണ്‍സണ്‍ കക്കാട്ട്, ചെറിയാൻ പനച്ചിക്കൽ, അപ്പച്ചൻ മങ്ങാട്ട്കുന്നേൽ, പാപ്പച്ചൻ കമുങ്ങ്കാട്ടിൽ, ത്രേസ്യാമ്മ കിരിക്കുന്നേൽ, എത്സമ്മ പാലത്താനത്ത് തുടങ്ങിയവർ പ്രസംഗിച്ചു.

പുനരധിവാസം വേഗത്തിലാക്കണം: സണ്ണി ജോസഫ്

കൽപ്പറ്റ: പുഞ്ചിരിമട്ടം ഉരുൾ ദുരന്തബാധിതരുടെ പുനരധിവാസം അടിയന്തരമായി നടപ്പാക്കണമെന്ന് കെപിസിസി പ്രസിഡന്‍റ് സണ്ണി ജോസഫ് എംഎൽഎ. ഉരുൾ ദുരന്തബാധിതർക്ക് നീതി ലഭ്യമാക്കണമെന്നതടക്കം ആവശ്യങ്ങൾ ഉന്നയിച്ച് യുഡിഎഫ് നിയോജകമണ്ഡലം കമ്മിറ്റി സംഘടിപ്പിച്ച കളക്ടറേറ്റ് മാർച്ചും ധർണയും ഉദ്ഘാടനം ചെയ്യുകയായിരുന്നു അദ്ദേഹം. ടൗണ്‍ഷിപ്പിന് ഏറ്റെടുത്ത ഭൂമിയിലെ തൊഴിലാളികൾക്ക് ആനകൂല്യങ്ങൾ എത്രയും വേഗം നൽകണം. അവരുടെ തൊഴിൽ സുരക്ഷ ഉറപ്പുവരുത്തണം. കോടിക്കണക്കിനു രൂപ ചെലവഴിച്ച് സംസ്ഥാന സർക്കാർ നടത്തുന്ന നാലാം വാർഷികാഘോഷം ദുരന്തബാധിതരോടും തൊഴിലാളികളോടുമുള്ള വെല്ലുവിളിയാണ്. ദുരന്തബാധിതരുടെ പ്രശ്നങ്ങൾ പരിഹരിക്കുന്നതിൽ സർക്കാർ പരാജയപ്പെട്ടു. കാബിനറ്റ് തീരുമാനമുണ്ടായിട്ടും ദിനബത്ത നൽകുന്നത് അഞ്ചുമാസം വൈകിയത് ദുരന്തബാധിതരോടുള്ള അവഗണനയാണ്. റോമാനഗരം കത്തിയെരിയുന്പോൾ വീണ വായിച്ച നീറോ ചക്രവർത്തിയെപോലെയാണ് മുഖ്യമന്ത്രി പിണറായി വിജയൻ. എൽസ്റ്റൻ എസ്റ്റേറ്റിലെ വാസസ്ഥലത്തുനിന്നു തൊഴിലാളികളെ ഒഴിപ്പിക്കുന്നതിനു മുന്പ് അവരുടെ പ്രശ്നങ്ങൾ പരിഹരിക്കണം. തൊഴിലാളികളെ പെരുവഴിയിൽ തള്ളാനുള്ള നീക്കം അനുവദിക്കില്ലെന്നും കെപിസിസി അധ്യക്ഷൻ പറഞ്ഞു. മുസ്ലിംലീഗ് നിയോജകമണ്ഡലം സെക്രട്ടറി സലിം മേമന അധ്യക്ഷത വഹിച്ചു. ഡിസിസി പ്രസിഡന്‍റ് എൻ.ഡി. അപ്പച്ചൻ, എംഎൽഎമാരായ ടി. സിദ്ദിഖ്, ഐ.സി. ബാലകൃഷ്ണൻ, നേതാക്കളായ പി.പി. ആലി, പി.കെ. ജയലക്ഷ്മി, കെ.എൽ. പൗലോസ്, ടി.ജെ. ഐസക്, എൻ.കെ. റഷീദ്, എം.എ. ജോസഫ്, ഒ.വി. അപ്പച്ചൻ, പോൾസണ്‍ കൂവക്കൽ, കെ. ഹാരിസ്, സി. ജയപ്രസാദ്, പ്രവീണ്‍ തങ്കപ്പൻ, ഗിരീഷ് കൽപ്പറ്റ, എം.പി. നവാസ്, ഹർഷൽ കോന്നാടൻ, എം.സി. സെബാസ്റ്റ്യൻ, ബിനു തോമസ്, ശോഭനാകുമാരി, പി. വിനോദ്കുമാർ, നജീബ് കരണി, മോയിൻ കടവൻ, ജാസർ പാലക്കൽ, വിജയമ്മ, എൻ.യു. ഉലഹന്നാൻ, ഷാജി കുന്നത്ത്, ശിഹാബ് മേപ്പാടി, സിദ്ദിഖ് തരിയോട്, ആയിഷ പള്ളിയാൽ, കെ. അജിത, കെ.കെ. ഹനീഫ, വിലാസിനി എന്നിവർ പ്രസംഗിച്ചു.

സ്കൂൾ ബസും ഡ്രൈവറും ഫിറ്റാണോ ?..... പരിശോധനയുമായി മോട്ടോർ വാഹന വകുപ്പ്

കൽപ്പറ്റ: സ്കൂൾ തുറക്കലിന് മുന്നോടിയായി സ്കൂൾ ബസുകളും ഡ്രൈവർമാരും ഫിറ്റാണോയെന്ന് പരിശോധിക്കാൻ മോട്ടോർ വാഹന വകുപ്പ് ഉദ്യോഗസ്ഥർ. ബസും ഡ്രൈവറും ഫിറ്റാണെങ്കിൽ ജൂണ്‍ രണ്ടിന് വാഹനം നിരത്തിലിറക്കാമെന്ന് അധികൃതർ. അധ്യയന വർഷം ആരംഭിക്കുന്നതിന് മുൻപ് സ്കൂൾ ബസുകളുടെ പരിശോധന കർശനമാക്കാൻ ഒരുങ്ങുകയാണ് മോട്ടോർ വാഹന വകുപ്പ്. ജില്ലയിലെ സ്കൂൾ ബസ് ഡ്രൈവർമാരുടെയും ബസുകളുടെയും പരിശോധന 28 മുതൽ 30 വരെ നടക്കും. റീജണൽ ട്രാൻസ്പോർട്ട് ഓഫീസറുടെ നേതൃത്വത്തിൽ 28ന് സ്കൂൾ ബസ് ഡ്രൈവർമാർക്ക് പ്രത്യേക പരിശീലന ക്ലാസ് നൽകും. ഡ്രൈവർമാർ ക്ലാസിൽ പങ്കെടുക്കുന്നുണ്ടെന്ന് സ്കൂൾ അധികൃതർ ഉറപ്പാക്കണം. ലഹരി ഉപയോഗം, റോഡ് സേഫ്റ്റി, കുട്ടികളുടെ സുരക്ഷ, സമൂഹ മാധ്യമങ്ങളുടെ ഇടപെടൽ, സ്കൂൾ ബസിൽ ആയമാരുടെ ആവശ്യം തുടങ്ങിയ വിഷയങ്ങൾ ക്ലാസെടുക്കും. അശ്രദ്ധമായി സ്കൂൾവാഹനം ഓടിക്കുന്നത് ശ്രദ്ധയിൽപ്പെട്ടാൽ പൊതുജനങ്ങൾക്ക് വാഹനത്തിൽ ഒട്ടിച്ച ഡെയ്ഞ്ചറസ് ഡ്രൈവിംഗ് സ്റ്റിക്കർ ഉപയോഗിച്ച് പരാതി നൽകാമെന്നും ലഹരി ഉപയോഗവുമായി ബന്ധപ്പെട്ട പരാതി നൽകാൻ എക്സൈസ് വകുപ്പിന്‍റെ നന്പർ വാഹനങ്ങളിൽ പ്രദർശിപ്പിക്കുമെന്നും ആർടിഒ അറിയിച്ചു. സ്കൂൾ ബസുകൾക്ക് മണിക്കൂറിൽ 50 കിലോ മീറ്ററാണ് വേഗപരിധി. ബസിൽ 12 വയസിൽ താഴെ പ്രായമുള്ള കുട്ടികൾക്ക് ഒരു സീറ്റിൽ രണ്ട് പേർക്ക് വീതം ഇരിക്കാം. 12 വയസിനു മുകളിൽ പ്രായമുള്ള കുട്ടികൾക്ക് ഒരാൾക്ക് ഒരു സീറ്റ് എന്ന നിലയിലാണ് സീറ്റിംഗ് ക്രമീകരിക്കുന്നത്. സ്കൂൾ വാഹനത്തിൽ വിദ്യാർഥികളെ നിന്ന് യാത്ര ചെയ്യാൻ അനുവദിക്കുകയില്ലെന്നും അത്തരത്തിൽ യാത്ര ചെയുന്നത് ശ്രദ്ധയിൽപ്പെട്ടാൽ സ്കൂൾ അധികൃതർക്കെതിരേ കർശന നടപടി സ്വീകരിക്കും. ഹെവി സ്കൂൾ വാഹനങ്ങൾ നിയമ വിരുദ്ധമായി ഓടിച്ചാൽ 7500 രൂപയും ഓട്ടോറിക്ഷയിൽ പരിധിക്ക് പുറമേ കുട്ടികളെ കയറ്റിയാൽ 3000 രൂപ പിഴയും പെർമിറ്റും റദ്ദാക്കും. പ്രൈവറ്റ് (നോണ്‍ ട്രാൻസ്പോർട്ട്) വാഹനങ്ങളിൽ കുട്ടികളെ കൊണ്ടു പോയാൽ വാഹന ഉടമയുടെ ആർസി, വാഹനം ഓടിക്കുന്ന വ്യക്തിയുടെ ലൈസൻസ് എന്നിവ റദ്ദാക്കും.

സിപിഎം വയനാട് മാർച്ച് നാളെ തുടങ്ങും

കൽപ്പറ്റ: പുഞ്ചിരിമട്ടം ഉരുൾ ദുരന്ത ബാധിതരോടുള്ള കേന്ദ്ര സർക്കാരിന്‍റെ അവഗണനയിൽ പ്രതിഷേധിക്കുന്നതിനും ജില്ലയുടെ വികസന വിഷയങ്ങൾ ഉയർത്തുന്നതിനും എൽഡിഎഫ് സർക്കാരിന്‍റെ ഭരണനേട്ടങ്ങൾ ജനങ്ങളോട് വിശദീകരിക്കുന്നതിനും സിപിഎം ജില്ലാ കമ്മിറ്റിയുടെ വയനാട് മാർച്ച് നാളെ തുടങ്ങും. 27 വരെ നീളുന്ന മാർച്ച് നാളെ വൈകുന്നേരം നാലിന് കാട്ടിക്കുളത്ത് പാർട്ടി സംസ്ഥാന സെക്രട്ടറി എം.വി. ഗോവിന്ദൻ ഉദ്ഘാടനം ചെയ്യുമെന്ന് ജില്ലാ സെക്രട്ടറി കെ. റഫീഖ്, സംസ്ഥാന കമ്മിറ്റിയംഗം സി.കെ. ശശീന്ദ്രൻ, ജില്ലാ സെക്രട്ടേറിയറ്റ് അംഗങ്ങളായ രുക്മണി സുബ്രഹ്മണ്യൻ, എ.എൻ. പ്രഭാകരൻ, എം. മധു എന്നിവർ വാർത്താസമ്മേളനത്തിൽ അറിയിച്ചു. ജാഥയിൽ 150 സ്ഥിരാഗംങ്ങളുണ്ടാകും. ഓരോ ഏരിയയിലും 500ൽ അധികം പേർ മാർച്ചിൽ അണിനിരക്കും. ദുരന്ത ബാധിതരുടെ പുനരധിവാസത്തിനും വന്യമൃഗശല്യ പ്രതിരോധത്തിനും സംസ്ഥാനം കേന്ദ്രത്തിന് സമർപ്പിച്ച പ്രത്യേക പാക്കേജുകൾ അംഗീകരിക്കുക, വനം-വന്യജീവി സംരക്ഷണ നിയമം ഭേദഗതി ചെയ്യുക, കോഴിക്കോട്-കൊല്ലഗൽ ദേശീയപാതയിലെയും ബാവലി-മൈസൂരു പാതയിലെയും രാത്രിയാത്രാ വിലക്ക് നീക്കാൻ കേന്ദ്ര, കർണാടക സർക്കാരുകൾ ഇടപെടുക, ചുരം ബദൽ പാതകൾക്ക് കേന്ദ്രാനുമതി നൽകുക,തുടങ്ങിയ ആവശ്യങ്ങൾ മാർച്ചിൽ ഉന്നയിക്കും. ഇന്ന് ലോക്കൽ കേന്ദ്രങ്ങളിൽ വിളംബരറാലി നടത്തും. 19ന് തലപ്പുഴയിൽ സംസ്ഥാന സെക്രട്ടേറിയറ്റ് അംഗം എം.വി. ജയരാജൻ, 21ന് വെള്ളമുണ്ട എട്ടേനാലിൽ സംസ്ഥാന കമ്മിറ്റി അംഗം വി. വസീഫ്, 22ന് പടിഞ്ഞാറത്തറയിൽ മുൻ മന്ത്രി കെ.ടി. ജലീൽ, 23ന് ചുണ്ടേലിൽ സംസ്ഥാന കമ്മിറ്റി അംഗം എം. മെഹബൂബ്, 24ന് മുട്ടിലിൽ സംസ്ഥാന കമ്മിറ്റി അംഗം എ.എ. റഹിം എംപി, 25ന് മീനങ്ങാടിയിൽ സംസ്ഥാന കമ്മിറ്റി അംഗം പി. മോഹനൻ, 26ന് കേണിച്ചിറയിൽ സംസ്ഥാന സെക്രട്ടേറിയറ്റ് അംഗം എം. സ്വരാജ് എന്നിവർ സമാപന യോഗം ഉദ്ഘാടനം ചെയ്യും. 27ന് വൈകുന്നേരം ബത്തേരിയിൽ സമാപന സമ്മേളനം കേന്ദ്ര കമ്മിറ്റി അംഗം ഇ.പി. ജയരാജൻ ഉദ്ഘാടനം ചെയ്യും.

വയനാട് ഡിസിസി ട്രഷററുടെ ആത്മഹത്യ : ആരോപണങ്ങൾ ഉചിതമായ രീതിയിൽ നേരിടുമെന്ന് കെപിസിസി അധ്യക്ഷൻ

കൽപ്പറ്റ: വയനാട് ഡിസിസി ട്രഷറർ ബത്തേരി പൂമല എൻ.എം. വിജയനും മക്കളിൽ ഒരാളും വിഷം അകത്തുചെന്നു മരിച്ചതുമായി ബന്ധപ്പെട്ട് കോണ്‍ഗ്രസ് നേതൃത്വത്തിനെതിരേ ഉയർന്ന ആരോപണങ്ങളെ ഉചിതമായ രീതിയിൽ നേരിടുമെന്ന് കെപിസിസി അധ്യക്ഷൻ സണ്ണി ജോസഫ് എംഎൽഎ. ഡിസിസി ഓഫീസിൽ മാധ്യമപ്രവർത്തകരുമായി സംസാരിക്കുകയായിരുന്നു അദ്ദേഹം. വിജയന്‍റെ കുടുംബത്തിന്‍റെ ബാധ്യത പാർട്ടി വീട്ടുന്നതിനെക്കുറിച്ചുള്ള ചോദ്യത്തിന് ആലോചിക്കുമെന്ന് സണ്ണി ജോസഫ് പ്രതികരിച്ചു. സഹകരണ ബാങ്കുകളിൽ നിയമനം വാഗ്ദാനം ചെയ്ത് പലരിൽനിന്നും വാങ്ങി കോണ്‍ഗ്രസ് നേതാക്കളിൽ ചിലരെ ഏൽപ്പിച്ച തുകയാണ് വിജയന്‍റെ ബാധ്യതയായി മാറിയത്. കെപിസിസി നേതാക്കൾക്കടക്കം കത്ത് നൽകിയിട്ടും ബാധ്യത വീട്ടുന്നതിനു ഇടപെടൽ ഉണ്ടായില്ല. ഈ സാഹചര്യത്തിലാണ് വിജയനും മക്കളിൽ ഒരാളും വിഷം അകത്തുചെന്നു മരിച്ചത്. ഇത് ജില്ലയിൽ കോണ്‍ഗ്രസ് നേതൃത്വത്തെ പ്രതിസന്ധിയിലാക്കിയിരുന്നു. വിജയന്‍റെ ബാധ്യതകൾ പാർട്ടി ഏറ്റെടുക്കുമെന്ന് നേതാക്കളിൽ ചിലർ കുടുംബാംഗങ്ങളെ അറിയിച്ചെങ്കിലും കാര്യപ്രസക്തമായ നീക്കം ഉണ്ടായില്ല. ഏറ്റവും ഒടുവിൽ ബത്തേരിയിലെത്തിയ പ്രിയങ്ക ഗാന്ധി എംപിയെ നേരിൽക്കണ്ട് നിവേദനം നൽകാൻ വിജയന്‍റെ മകന്‍റെ ഭാര്യ നടത്തിയ ശ്രമം വിഫലമായി. പ്രിയങ്കയെ കാണാൻ അവർക്ക് അവസരം ലഭിച്ചില്ല. ഇതേത്തുടർന്ന് വിജയന്‍റെ ബാധ്യതയുടെ കാര്യത്തിൽ പാർട്ടി നേതൃത്വം വഞ്ചിച്ചെന്ന ആരോപണം മകനും മരുമകളും പരസ്യമായി ഉന്നയിച്ചിരുന്നു. വിജയന്‍റെയും മകന്‍റെയും മരണവുമായി ബന്ധപ്പെട്ട കാര്യങ്ങൾ അന്വേഷിക്കാൻ കെപിസിസി നിയോഗിച്ച സമിതിയിൽ സണ്ണി ജോസഫ് അംഗമായിരുന്നു. എന്നിരിക്കേയായിരുന്നു കെപിസിസി അധ്യക്ഷനായതിനുശേഷം ആദ്യമായി ഡിസിസി ഓഫീസിലെത്തിയ സണ്ണി ജോസഫിനോട് മാധ്യമപ്രവർത്തകരുടെ ചോദ്യം. കെപിസിസി അധ്യക്ഷസ്ഥാനത്തുനിന്നു മാറേണ്ട സമയമായില്ലെന്ന് കെ. സുധാകരൻ കഴിഞ്ഞ ദിവസം പറഞ്ഞത് ശ്രദ്ധയിൽപ്പെടുത്തിയപ്പോൾ ഇക്കാര്യത്തിൽ മറുപടി പറയാൻ ആളല്ലെന്ന് സണ്ണി ജോസഫ് വ്യക്തമാക്കി. കെപിസിസി പ്രസിഡന്‍റ് സഭയുടെ പ്രതിനിധിയാണെന്നു ചിലർ പറയുന്നതിനെക്കുറിച്ച് ചോദിച്ചപ്പോൾ നിയമസഭയിലുള്ള ടി. സിദ്ദിഖും ഐ.സി. ബാലകൃഷ്ണനും മറ്റും തന്‍റെ പേരാണ് മുകളിലേക്കു നിർദേശിച്ചതെന്നാണ് മനസിലാക്കുന്നതെന്നായിരുന്നു മറുപടി. ശശി തരൂർ എംപി നടത്തുന്ന ബിജെപി അനുകൂല പ്രസ്താവനകളെക്കുറിച്ച് ആരാഞ്ഞപ്പോൾ ഹൈക്കമാൻഡ് അക്കാര്യത്തിൽ പ്രതികരിച്ചിട്ടുണ്ടെന്ന് സണ്ണി ജോസഫ് പറഞ്ഞു. സംസ്ഥാനത്ത് പാർട്ടിയെ കൂടുതൽ കരുത്തുള്ളതാക്കുമെന്നും മുഴുവൻ കോണ്‍ഗ്രസ് പ്രവർത്തകരുടെയും സഹകരണം ഉറപ്പുവരുത്തുമെന്നും കെപിസിസി അധ്യക്ഷൻ പറഞ്ഞു. ഡിസിസി പ്രസിഡന്‍റ് എൻ.ഡി. അപ്പച്ചൻ, നേതാക്കളായ ടി. സിദ്ദിഖ് എംഎൽഎ, കെ.എൽ. പൗലോസ്, പി.പി. ആലി, എം.എ. ജോസഫ് തുടങ്ങിയവർ ഒപ്പമുണ്ടായിരുന്നു.

കൃഷിയിടം നഷ്ടമായവർക്ക് ഭൂമി നൽകണമെന്ന്

കൽപ്പറ്റ: പുഞ്ചിരിമട്ടം ഉരുൾദുരന്തത്തിൽ മുണ്ടക്കൈ, ചൂരൽമല ഉൾപ്പെടെ പ്രദേശങ്ങളിൽ കൃഷിഭൂമി നഷ്ടമായവർക്ക് പകരം ഭൂമി നൽകണമെന്ന് കർഷക കോണ്‍ഗ്രസ് ജില്ലാ കമ്മിറ്റി സർക്കാരിനോട് ആവശ്യപ്പെട്ടു. ഡിസിസി പ്രസിഡന്‍റ് എൻ.ഡി. അപ്പച്ചൻ ഉദ്ഘാടനം ചെയ്തു. കർഷക കോണ്‍ഗ്രസ് ജില്ലാ പ്രസിഡന്‍റ് പി.എം. ബെന്നി അധ്യക്ഷത വഹിച്ചു. ബൈജു ചാക്കോ, പി.എ. പൗലോസ്, എം.എ. പൗലോസ്, ടോമി തേക്കുമല, വി. ഡി. ജോസ്, എം.വി. വിൻസന്‍റ്, ഒ.വി. അപ്പച്ചൻ, റിനു ജോണ്‍, ജോണ്‍ മാതാ, ബെന്നി വട്ടപ്പറന്പിൽ, പ്രമോദ് തൃക്കൈപ്പറ്റ, ഇ.ജെ. ഷാജി, പരിതോഷ്കുമാർ, കെ.ജെ. ജോണ്‍ എന്നിവർ പ്രസംഗിച്ചു.

സാമൂഹ്യ വിരുദ്ധർ കാർഷിക വിളകൾ വെട്ടിനശിപ്പിച്ചതായി പരാതി

പുൽപ്പള്ളി: പാറക്കടവിൽ സാമൂഹ്യ വിരുദ്ധർ കാർഷിക വിളകൾ വെട്ടിനശിപ്പിച്ചതായി പരാതി. കളരിക്കൽ വർഗീസിന്‍റെ കൃഷിയിടത്തിലാണ് സമൂഹ വിരുദ്ധർ നാശനഷ്ടമുണ്ടാക്കിയത്. തോട്ടത്തിലെ കമുക്, കാപ്പി തുടങ്ങിയ വിളകളും ജലസേചനത്തിനുള്ള പൈപ്പ് ലൈനുകളും വെട്ടിനശിപ്പിച്ചു. കൃഷിയിടത്തിലേക്ക് വൈദ്യുതിയെത്തിക്കുന്നതിനുള്ള സർവീസ് വയറും നശിപ്പിച്ചിട്ടുണ്ട്. കഴിഞ്ഞ തിങ്കളാഴ്ചയാണ് തോട്ടത്തിൽ കാർഷിക വിളകൾ വെട്ടിനശിപ്പിച്ചതായി ശ്രദ്ധയിൽപ്പെട്ടത്. തുടർന്ന് പുൽപ്പള്ളി പോലീസിൽ പരാതി നൽകിയിരുന്നു. ഇതിന് പിന്നാലെ ബുധനാഴ്ചയും കൃഷിയിടത്തിൽ സമൂഹ വിരുദ്ധർ നാശനഷ്ടങ്ങളുണ്ടാക്കി. പോലീസ് അന്വേഷണം നടത്തി സംഭവത്തിന് പിന്നിൽ പ്രവർത്തിച്ചവരെ കണ്ടെത്തി മാതൃകാപരമായി ശിക്ഷിക്കണമെന്ന് നാട്ടുകാർ ആവശ്യപ്പെട്ടു.

നിരോധിത പ്ലാസ്റ്റിക് ഉത്പന്നങ്ങൾ പിടിച്ചെടുത്തു

കൽപ്പറ്റ: ജില്ലാ എൻഫോഴ്സ്മെന്‍റ് നേതൃത്വത്തിൽ നടത്തിയ മിന്നൽപരിശോധനയിൽ നിരോധിത പ്ലാസ്റ്റിക് ഉത്പന്നങ്ങൾ പിടിച്ചടുത്തു. അന്പലവയൽ ഷമീർ ചിക്കൻ സ്റ്റാളിൽ നിന്നാണ് നിരോധിത പ്ലാസ്റ്റിക് ഉത്പന്നങ്ങൾ കണ്ടെത്തിയത്. ജില്ലാ സ്ക്വാഡിന്‍റെ പരിശോധനയിൽ 10,000 രൂപ പിഴയിട്ടു.

കണിയാരം എഎൽപി സ്കൂൾ കെട്ടിടം ഉദ്ഘാടനം ചെയ്തു

മാനന്തവാടി: കണിയാരം എഎൽപി സ്കൂളിനു പുതുതായി നിർമിച്ച കെട്ടിടത്തിന്‍റെ വെഞ്ചരിപ്പും ഉദ്ഘാടനവും മാനന്തവാടി രൂപത ബിഷപ് മാർ ജോസ് പൊരുന്നേടം നിർവഹിച്ചു. വിദ്യാലയത്തിന്‍റെ 76-ാം വാർഷികാഘോഷം ഇതോടനുബന്ധിച്ച് നടത്തി. സേവനത്തിൽനിന്നു വിരമിക്കുന്ന പ്രധാനാധ്യാപിക കെ.എം. ബീനയ്ക്കു യാത്രയയപ്പ് നൽകി. യാത്രയയപ്പ് സമ്മേളനം ബിഷപ് ഉദ്ഘാടനം ചെയ്തു. രൂപത കോർപറേറ്റ് മാനേജർ ഫാ.സിജോ ഇളംകുന്നപ്പുഴ അധ്യക്ഷത വഹിച്ചു. ലഹരിവിരുദ്ധ പ്രവർത്തനങ്ങളിലെ മികവിനുള്ള പുരസ്കാരം വിദ്യാലയത്തിനു അദ്ദേഹം സമ്മാനിച്ചു. വിവിധ മേഖലകളിൽ മികവു പുലർത്തിയവരെ സ്കൂൾ മാനേജർ ഫാ.സോണി വാഴക്കാട്ട് അനുമോദിച്ചു. നഗരസഭാ ചെയർപേഴ്സണ്‍ സി.കെ. രത്നവല്ലി കംപ്യൂട്ടർ ലാബ് ഉദ്ഘാടനം ചെയ്തു. വൈസ് ചെയർമാൻ ജേക്കബ് സെബാസ്റ്റ്യൻ "ഉജ്വലം’ പുരസ്കാരം വിതരണം നിർവഹിച്ചു. സ്റ്റാൻഡിംഗ് കമ്മിറ്റി അധ്യക്ഷരായ സിന്ധു സെബാസ്റ്റ്യൻ, ലേഖ രാജീവൻ, കൗണ്‍സിലർ സുനി ഫ്രാൻസിസ് എന്നിവർ എൻഡോവ്മെന്‍റ് വിതരണം നടത്തി. സ്പർശം പുസ്തകം ബിപിസി കെ.കെ. സുരേഷ് പ്രകാശനം ചെയ്തു. റിട്ട.എഇഒ എ.കെ. മുരളീധരൻ, സെന്‍റ് ജോസഫ്സ് ടിടിഐ പ്രിൻസിപ്പൽ കെ.ജെ. ബെന്നി എന്നിവർ പ്രതിഭകളെ ആദരിച്ചു. എഇഒ ഇൻ ചാർജ് എൻ.എസ്. ഷീബ പങ്കെടുത്തു. വൈഖരി ഈവ്, കലാപരിപാടികൾ എന്നിവ നടന്നു. രണ്ടു കോടി ചെലവിലാണ് സ്കൂളിനു മൂന്നുനില കെട്ടിടം നിർമിച്ചത്. സാധാരണ ക്ലാസ് മുറികൾ, സ്മാർട്ട് ക്ലാസ് മുറികൾ, കംപ്യൂട്ടർ ലാബ്, ലൈബ്രറി, ആധുനിക സൗകര്യങ്ങളുള്ള ശൗചാലയങ്ങൾ എന്നിവ കെട്ടിടത്തിലുണ്ട്.

ലയയും കുടുംബവും ഇനി പുതിയ വീട്ടിൽ അന്തിയുറങ്ങും

മാനന്തവാടി: പുഞ്ചിരിമട്ടം ഉരുൾപൊട്ടലിൽ വീടു നിഷ്ടപ്പെട്ട മേപ്പാടി ജിഎച്ച്എസ്എസിലെ ഒന്പതാം ക്ലാസ് വിദ്യാർഥി ലയയ്ക്ക് വേണ്ടി നൻമ മനസുകളുടെ സഹായത്തോടെ നിർമിച്ച വീടിന്‍റെ താക്കോൽ കൈമാറി. അയർലൻഡ് വാട്ടർ ഫോർഡ് സെന്‍റ് മേരീസ് സീറോമലബാർ കാത്തലിക് ഇടവക സമൂഹമാണ് വീടു നിർമിച്ചു നൽകിയത്. 18 ലക്ഷം രൂപ ചെലവിലാണ് പ്രവർത്തികൾ പൂർത്തീകരിച്ചത്. മാനന്തവാടി സെന്‍റ് ജോസഫ്സ് കത്തീഡ്രൽ ഇടവകാംഗം സണ്ണി വണ്ടന്നൂർ പാലാക്കുളിയിൽ സൗജന്യമായി നൽകിയ ഏഴു സെന്‍റ് സ്ഥലത്താണ് വീടു നിർമിച്ചത്. അയർലന്‍റിൽ താമസിക്കുന്ന സണ്ണിയുടെ മകൾ ആഷ്ലിനും ഭർത്താവ് ബിബിനും ദുരന്തത്തിൽ ഇരയായവർക്ക് സഹായം എന്ന ആശയം ഇടവകയിൽ അറിയിക്കുകയും ഇടവക വികാരി ഫാ. ജോമോൻ കാക്കനാട്ടിന്‍റെ നേതൃത്വത്തിൽ 12 അംഗ കണ്‍സ്ട്രക്ഷൻ കമ്മിറ്റി പ്രവർത്തനങ്ങൾ ഏകോപിപ്പിക്കുകയും ചെയ്തതോടെ ലയക്കും കുടുംബത്തിനും വീടെന്ന സ്വപ്നം പൂവണിയുകയായിരുന്നു. ഗൃഹ പ്രവേശനം നാടമുറിച്ചുകൊണ്ടും താക്കോൽ കൈമാറിയും ഫാ. ജോമോൻ കാക്കനാട്ട് നിർവഹിച്ചു. മാനന്തവാടി സെന്‍റ് ജോസഫ്സ് കത്തീഡ്രൽ ഇടവക വികാരി ഫാ. സോണി വാഴക്കാട്ട് വെഞ്ചരിപ്പ് കർമ്മം നിർവഹിച്ചു. സണ്ണി വണ്ടന്നൂർ, ലയ, ലയയുടെ മാതാവ് സന്ധ്യ, സഹോദരങ്ങൾ, കുടുംബാംഗങ്ങൾ, പള്ളി കമ്മിറ്റി ഭാരവാഹികൾ എന്നിവർ പങ്കെടുത്തു. സണ്ണി വണ്ടന്നൂരിന്‍റെ ആത്മാർത്ഥമായ നേതൃത്വത്തിന് വാട്ടർഫോർഡ് ഇടവകസമൂഹത്തിന്‍റെ മെമന്േ‍റാ നൽകി ആദരിച്ചു. കണ്‍സ്ട്രക്ഷൻ കമ്മിറ്റി അഗങ്ങളായ ലൂയിസ്, ടോം, ടെഡി, ജോസ്മോൻ, ജോജോ, സൈജു, എബി, ലിനറ്റ്, മനോജ്, അമിത്, രേഖ, സൗമ്യ എന്നിവർക്കുള്ള നന്ദിയും ചടങ്ങിൽ അറിയിച്ചു.

വനം വകുപ്പ് കസ്റ്റഡിയിലെടുത്ത സ്കാനിയ ബസ് പുറത്തിറക്കി

സുൽത്താൻ ബത്തേരി: ബസ് ഇിടിച്ച് മാൻ ചത്ത സംഭവത്തിൽ വനംവകുപ്പ് കസ്റ്റഡിയിലെടുത്ത കഐസ്ആർടിസി സ്കാനിയ ബസ് ഇന്നലെ പുറത്തിറക്കി. സുൽത്താൻ ബത്തേരി ജഐഫ്സിഎം കോടതിയിൽ നിന്ന് ഇന്നലെ റിലീസിംഗ് ഓർഡർ കിട്ടി ഉച്ചയോടെയാണ് ബസ് വനം വകുപ്പിന്‍റെ കുപ്പാടിയിലെ ആർആർടി ഓഫീസ് പരിസരത്തി നിന്നും കഐസ്ആർടിസി ബത്തേരി ഡിപ്പോയിലെത്തിച്ചത്. 13 ലക്ഷം രൂപ കോടതിയിൽ ബോണ്ടായി കെട്ടിവച്ചാണ് ബസ് ഇറക്കിയത്. കഴിഞ്ഞ മാസം 19ന് രാവിലെ മുത്തങ്ങക്കടുത്ത എടത്തറയിൽ റോഡ് മുറിച്ചു കടക്കുന്ന പുള്ളിമാനെ സ്കാനിയ ബസിടിച്ചതിനെ തുടർന്നാണ് ബസ് കസ്റ്റഡിയിലെടുത്തത്. വന്യജീവി സംരക്ഷണ നിയമത്തിൽ നായാട്ടിനുള്ള സെക്ഷൻ ഒന്പത് പ്രകാരം ഡ്രൈവറുടെ പേരിൽ കേസെടുക്കുകയും ചെയ്തു. മാനിടിച്ച് ബസിന്‍റെ ബംപറിനും ചക്രങ്ങൾക്കും കേടുപാടുകൾ സംഭവിച്ചു. കഴിഞ്ഞ 26 ദിവസമായി വണ്ടി നിർത്തിയിട്ടിരുന്നതിനാൽ ബാറ്ററിയുടെ പ്രവർത്തന ക്ഷമത നഷ്ടപ്പെടുകയും ചെയ്തു. ഇന്നലെ ഡിപ്പോയിലെത്തിച്ച വണ്ടി വർക്ക്ഷോപ്പിലെ വിദഗ്ധ പരിശോധനയ്ക്ക് ശേഷമാണ് സർവീസിനായി സജ്ജമാക്കിയത്.

പരിസ്ഥിതി മാസാചരണത്തെ വരവേൽക്കാൻ ഒരുങ്ങി ഒയിസ്ക

കൽപ്പറ്റ: ഒയിസ്ക ഇന്‍റർനാഷണലിന്‍റെ നേതൃത്വത്തിൽ ജൂണ്‍ അഞ്ച് മുതൽ ജൂലെ നാല് വരെ പരിസ്ഥിതി മാസാചരണം കൊണ്ടാടുന്നതിന്‍റെ ഭാഗമായി തൈകളുടെയും തണ്ടുകളുടെയും ശേഖരണാർത്ഥം മൂന്നുദിവസം നീണ്ടുനിൽക്കുന്ന പരിസ്ഥിതി പഠനയാത്ര സംഘടിപ്പിച്ചു. ഒയിസ്ക സൗത്ത് ഇന്ത്യയിലെ മികച്ച പരിസ്ഥിതി പ്രവർത്തകനുള്ള അവാർഡ് ഉൾപ്പെടെ നിരവധി അവാർഡുകൾ കരസ്ഥമാക്കിയ പരിസ്ഥിതി പ്രവർത്തകനും ഒയിസ്ക കണ്ണൂർ ജില്ലാ സെക്രട്ടറിയുമായ കക്കോത്ത് പ്രഭാകരന്‍റെ നേതൃത്വത്തിലാണ് പഠനയാത്ര സംഘടിപ്പിച്ചത്. രുദ്രാക്ഷം, ഉങ്ങ്, നാഗമരം, പൊൻ ചെന്പകം, മന്ദാരം തുടങ്ങി നിരവധി വൃക്ഷത്തൈകളുടെ വിത്തുകളും തണ്ടുകളും ശേഖരിച്ചു. വിത്ത് ശേഖരണത്തിന്‍റെ സമാപന പരിപാടി കൽപ്പറ്റയിൽ നടന്നു. ഒയിസ്ക ഇന്‍റർനാഷണൽ കൽപ്പറ്റ ചാപ്റ്റർ വൈസ് പ്രസിഡന്‍റ് കെ.ടി. വർഗീസ് പ്രഭാകരനെ ആദരിച്ചു. കൽപ്പറ്റ ചാപ്റ്ററിന്‍റെ നേതൃത്വത്തിൽ സമാഹരിച്ച വിത്തുകളുടെ കൈമാറ്റം നടന്നു. മീനങ്ങാടി ഒയിസ്ക ഇക്കൊ റിസോഴ്സ് സെന്‍റർ, പുൽപ്പള്ളി, മാവിലാംത്തോട്, സുൽത്താൻ ബത്തേരി, മുട്ടിൽ, കൽപ്പറ്റ, പടിഞ്ഞാറത്തറ, മാനന്തവാടി തുടങ്ങിയ പ്രദേശങൾ സന്ദർശിച്ചു. കൽപ്പറ്റ ചാപ്റ്റർ ജോയിന്‍റ് സെക്രട്ടറിമാരായ മെഡിക്കൽ ഓഫീസർ ഡോ.ടി.സി. അനിത, എം. ഉമ്മർ, കൊയിലേരി ടി.സി. റോയി ചാക്കോ, നിരവിൽപുഴ അജേഷ് എന്നിവർ വിത്തുകൾ പ്രഭാകരന് കൈമാറി.

കൽപ്പറ്റ മണ്ഡലത്തിൽ അവലോകന യോഗം ചേർന്നു

വെണ്ണിയോട്: ടി. സിദ്ദിഖ് എംഎൽഎയുടെ നേതൃത്വത്തിൽ മണ്ഡലത്തിലെ വിവിധ തലങ്ങളിലുള്ള വികസന പ്രവർത്തനങ്ങൾ വിലയിരുത്തി. വികസന പ്രവർത്തനങ്ങൾക്ക് വേഗം കൂട്ടാനുള്ള ഇടപെടലുകൾ നടത്തി. കെപിസിസി അംഗം പി.പി. ആലി, യുഡിഎഫ് ചെയർമാൻ പി.സി. കോട്ടത്തറ, കണ്‍വീനർ സുരേഷ് ബാബു വാളൽ, മണ്ഡലം പ്രസിഡന്‍റ് സി.സി. തങ്കച്ചൻ, ബ്ലോക്ക് പ്രസിഡന്‍റ് പോൾസണ്‍ കൂവക്കൽ, പഞ്ചായത്ത് പ്രസിഡന്‍റ് പി.പി. റെനീഷ്, മുസ്ലിം ലീഗ് പഞ്ചായത്ത് സെക്രട്ടറി കെ.കെ. മുഹമ്മദലി, മാണി ഫ്രാൻസിസ്, ഹണി ജോസ്, പി.എ. നസീമ, പുഷ്പ സുന്ദരൻ, ഇ.കെ. വസന്ത, ബിന്ദു മാധവൻ എന്നിവർ പ്രസംഗിച്ചു.

റിസോർട്ട് തകർന്ന് യുവതി മരിച്ച സംഭവം: സമഗ്രമായ അന്വേഷണം വേണമെന്ന്

മേപ്പാടി: മേപ്പാടിയിലെ പരിസ്ഥിതി ദുർബല പ്രദേശമായ തൊള്ളായിരംകണ്ടിയിൽ പ്രവർത്തിച്ച് വരുന്ന ടെന്‍റ് ഗ്രാമിലെ ഷെഡ് തകർന്ന് യുവതി മരിച്ച സംഭവത്തിൽ സമഗ്രമായ അന്വേഷണം വേണമെന്ന് സിപിഐ മേപ്പാടി ലോക്കൽ കമ്മിറ്റി ആവശ്യപ്പെട്ടു. പരിസ്ഥിതി ദുർബല പ്രദേശമായ തൊള്ളായിരംകണ്ടി എന്ന പ്രദേശം സെക്ഷൻ അഞ്ചിന്കീഴിലാണ് വരുന്നത്. അനുമതി ലഭിക്കാത്ത സ്ഥലത്ത് കെട്ടിടങ്ങൾ നിർമിച്ച് അനുമതി നേടുന്നതിന് പിന്നിൽ ചില പ്രമുഖ വ്യക്തികൾക്കും ഉദ്യോഗസ്ഥഗസ്ഥർക്കുമുള്ള പങ്ക് അന്വേഷിക്കണം. ഇതിന് മുന്പ് തൊട്ടടുത്ത് റിസോട്ടിൽ താമസിക്കാൻ വന്ന യുവതിയെ ആന കൊല്ലപ്പെടുത്തിയ സംഭവത്തെത്തുടർന്ന് ലൈസൻസ് ഇല്ലാത്ത ഇത്തരം സ്ഥാപനങ്ങൾക്ക് നോട്ടീസ് നൽകി അടച്ച് പൂട്ടിയിരുന്നു. മാനദണ്ഡങ്ങളും പാലിക്കാതെ പ്രർത്തിക്കുന്ന ഹോം സ്റ്റേകൾ, മറ്റ് കേന്ദ്രങ്ങൾ എന്നിവയ്ക്കുനേരെ നടപടിയെടുക്കാൻ പഞ്ചായത്ത് ഭരണസമതി തയാറാകണമെന്നും സിപിഐ മേപ്പാടി ലോക്കൽ കമ്മിറ്റി അധികൃതരോട് ആവശ്യപ്പെട്ടു.

കോത്തഗിരിയിൽ കാട്ടാനശല്യം രൂക്ഷമായി

ഉൗട്ടി: കോത്തഗിരി മേഖലയിൽ കാട്ടാനശല്യം രൂക്ഷമായി. കോത്തഗിരി, കുഞ്ചപ്പന, കോഴിക്കര തുടങ്ങിയ ഭാഗങ്ങളിലാണ് കാട്ടാനശല്യം രൂക്ഷമായിരിക്കുന്നത്. കൂട്ടമായാണ് ആനകൾ ഇറങ്ങുന്നത്. ജനവാസ മേഖലയിലും കൃഷിയിടങ്ങളിലും വ്യാപക നാശമാണ് വരുത്തുന്നത്. ജനങ്ങൾ ഭീതിയോടെയാണ് കഴിയുന്നത്. കോത്തഗിരി-മുള്ളൂർമല റോഡിലിറങ്ങി ഗതാഗതം തടസപ്പെടുത്തിന്നതും പതിവാണ്. ഇത്കാരണം ഡ്രൈവർമാരും ഭീതിയിലാണ്. ആനശല്യത്തിന് പരിഹാരം കാണണമെന്നാണ് ജനങ്ങൾ ആവശ്യപ്പെടുന്നത്.

നീന്തൽ പരിശീലനം തുടർന്ന് കായിക അധ്യാപകർ

പുൽപ്പള്ളി: കായികാധ്യാപക ജീവിതത്തിൽ നിന്ന് വിരമിച്ചെങ്കിലും നീന്തൽ പരിശീലനം തുടർന്ന് പുല്ലാനിക്കാവിൽ ഡീവൻസും ജോണ്‍സണ്‍ വിരിപ്പാമറ്റവും. കുടിയേറ്റ മേഖലയായ പുൽപ്പള്ളിയിൽ നിന്നാരംഭിച്ച് ജില്ലയിലെ എല്ലാ മേഖലകളിലുമെത്തി വിദ്യാർഥികളെ നീന്തൽ അഭ്യസിപ്പിച്ച ചരിത്രവും ഡീവൻസിനും ജോണ്‍സണും സ്വന്തമാണ്. ഒരു പതിറ്റാണ്ടുകാലമായി പരിശീലന ക്യാന്പുകളടക്കം നടത്തി ഈ അധ്യാപകർ കുട്ടികളെ നീന്തൽ അഭ്യസിപ്പിച്ച് വരികയാണ്. പുൽപ്പള്ളി, മുള്ളൻകൊല്ലി, കബനിഗിരി, പൂതാടി എന്നിവിടങ്ങളിലാണ് പരിശീലന ക്യാന്പുകൾ നടത്തിവന്നിരുന്നത്. ആദ്യം നീന്തൽ പരിശീലനരംഗത്തേക്ക് കടന്നുവരുന്നവരുടെയെണ്ണം കുറവായിരുന്നുവെങ്കിലും പിന്നീട് നിരവധി പേരാണ് ഈ മേഖലയിലേക്കെത്തിയതെന്ന് അധ്യാപകർ പറയുന്നു. പരിക്കുകൾക്ക് ഏറ്റവും സാധ്യത കുറവുള്ള മത്സരയിനമായ നീന്തൽ കായികക്ഷമത വർധിപ്പിക്കാനുള്ള ഉപാധി കൂടിയാണെന്നും അധ്യാപകർ പറഞ്ഞു. പുൽപ്പള്ളി വേലിയന്പം ദേവിവിലാസം സ്കൂളിലെ കായികാധ്യാപകനായി 31 വർഷത്തെ സർവീസിന് ശേഷം വിരമിച്ചിട്ടും കായികപ്രവർത്തനങ്ങളിൽ നിന്നും ഡീവൻസ് പിന്നോട്ടുപോകാൻ തയ്യാറായില്ല. പുൽപ്പള്ളി വിജയാഹയർ സെക്കണ്ടറി സ്കൂളിൽ നിന്ന് വിരമിച്ച ശേഷം പുൽപ്പള്ളി സെന്‍റ് മേരീസ് ഇംഗ്ലിഷ് മീഡിയം സ്കൂളിൽ ജോലി ചെയ്ത് വരുന്ന കായികാധ്യാപകൻ ജോണ്‍സണും നീന്തൽ പരിശീലനത്തിൽ സജീവമാണ്. നീന്തൽ എല്ലാവരും അഭ്യസിച്ചിരിക്കേണ്ടതെന്നതാണെന്നും വ്യായാമത്തോടൊപ്പം ജീവൻ രക്ഷിക്കാനുള്ള ഉപാധികൂടിയാണ് നീന്തലെന്നും ജോണ്‍സണ്‍ വിരിപ്പാമറ്റവും ഡീവൻസും പറഞ്ഞു.

വണ്ടിക്കടവ് -ചാമപ്പാറ റോഡ് തകർന്നു: അപകടങ്ങൾ നിത്യസംഭവം

പുൽപ്പള്ളി: വണ്ടിക്കടവ് - ചാമപ്പാറ തീരദേശറോഡ് തകർന്നതോടെ ഈ റൂട്ടിൽ വാഹനങ്ങൾ അപകടത്തിൽ പെടുന്നത് നിത്യസംഭവമായി. കഴിഞ്ഞ ദിവസം ഈ റോഡിൽ ഓംമ്നി വാൻ മറിഞ്ഞ് നിരവധി പേർക്ക് പരിക്കേറ്റു. വണ്ടിക്കടവ് - കൊളവള്ളി റോഡിൽ വണ്ടിക്കടവ് മുതൽ ചാമപ്പാറ വരെയുള്ള 2.3 കിലോമീറ്ററാണ് നാല് വർഷം മുൻപ് പൂട്ടുകട്ട പാകിയുറപ്പിച്ചത്. കട്ടയിളകാതെ വശങ്ങളിലും നടുവിലും സ്ഥാപിച്ച കോണ്‍ക്രീറ്റ് ബെൽറ്റ് പൊട്ടിത്തകർന്നിട്ട് കാലമേറെയായി. ബസുകൾ ഉൾപ്പടെയുള്ള ഭാരവാഹനങ്ങളും ചെറു വാഹനങ്ങളും ഇടതടവില്ലാതെ ഓടുന്ന റൂട്ടാണിത്. റോഡ് നിർമാണത്തിന്‍റെ ഗ്യാരന്‍റി സമയം കഴിഞ്ഞതിനാൽ അറ്റകുറ്റപ്പണികളൊന്നും നടക്കുന്നില്ല. കോണ്‍ക്രീറ്റ് ബെൽറ്റ് പൊട്ടിയതോടെ പലയിടത്തും പൂട്ടുകാകളും ഇളകിമാറി ഇരുചക്ര വാഹനങ്ങൾ ഇതിൽ തട്ടിമറിയുന്നതും പതിവാണ്. കോണ്‍ക്രീറ്റിന് ഉപയോഗിച്ച കന്പികളും പൊട്ടിയകന്ന് അപകടമുണ്ടാക്കുന്നു. ഇന്നലെ വാനിന്‍റെ ലീഫ് സെറ്റിൽ കന്പി കുടുങ്ങിയാണ് അപകടമുണ്ടായത് സീതാമൗണ്ട്, കൊളവള്ളി, മരക്കടവ് ഭാഗത്തുള്ളവർക്ക് മുള്ളൻകൊല്ലി, പാടിച്ചിറ ടൗണുകളൊഴിവാക്കി എളുപ്പം ബത്തേരിക്കും പുൽപ്പള്ളിക്കും പോകാൻ കഴിയുന്ന റൂട്ടാണ് ഇത്.

മുഖ്യമന്ത്രി എം.കെ. സ്റ്റാലിന്‍ ഊട്ടി മെഡിക്കല്‍ കോളജ് ആശുപത്രി സന്ദര്‍ശിച്ചു

ഊട്ടി: മുഖ്യമന്ത്രി എം.കെ. സ്റ്റാലിന്‍ ഊട്ടി ഗവ.മെഡിക്കല്‍ കോളജ് ആശുപത്രി സന്ദര്‍ശിച്ചു. വാര്‍ഡുകളില്‍ ചികിത്സയിലുള്ളവരോടും കൂട്ടിരിപ്പുകാരോടും അദ്ദേഹം വിവരങ്ങള്‍ ചോദിച്ചറിഞ്ഞു. ഒരേസമയം 1,300 പേര്‍ക്ക് കിടത്തിച്ചികിത്സ നല്‍കാന്‍ സൗകര്യം കഴിഞ്ഞ ഏപ്രിലില്‍ മുഖ്യമന്ത്രി ഉദ്ഘാടനം ചെയ്ത ആശുപത്രിയിലിലുണ്ട്. ചീഫ് വിപ്പ് കെ. രാമചന്ദ്രന്‍, നീലഗിരി എംപി എ. രാജ, ജില്ലാ കളക്ടര്‍ ലക്ഷ്മി ഭവ്യതന്നീറു, മെഡിക്കല്‍ കോളജ് പ്രഫ.ഗീതാഞ്ജലി, ഡോ.ജയലളിത തുടങ്ങിയവര്‍ മുഖ്യമന്ത്രിയെ അനുഗമിച്ചു.

‘ഹ്യുമാനിറ്റീസിന് കൂടുതൽ ബാച്ചുകൾ അനുവദിക്കുക’

കൽപ്പറ്റ: ജില്ലയിൽ വിജയികളായ മുഴുവൻ കുട്ടികൾക്കും അവസരം ലഭിക്കത്തക്കവിധത്തിൽ മാനവിക വിഷയങ്ങളിൽ കൂടുതൽ ബാച്ചുകൾ അനുവദിക്കണമെന്നും രക്ഷിതാക്കളുടെയും കുട്ടികളുടേയും ആശങ്കയകറ്റുന്നതിനുള്ള ക്രിയാത്മക ഇടപെടൽ സർക്കാരിന്‍റെ ഭാഗത്തു നിന്നും ഉണ്ടാകണമെന്നും എകെഎസ്ടിയു ജില്ലാ കമ്മിറ്റി ആവശ്യപ്പെട്ടു. ജില്ലയിൽ എസ്എസ്എൽസി പാസായ മുഴുവൻ വിദ്യാർഥികൾക്കും പ്രവേശനത്തിനാവശ്യമായ പ്ലസ് വണ്‍ സീറ്റുകൾ നിലവിലില്ല. പത്താം ക്ലാസ് പരീക്ഷയെഴുതിയ 11,640 വിദ്യാർഥികളിൽ 11,592 പേർ വിജയികളായി. സേ പരീക്ഷ കഴിയുന്പോഴുള്ള അപേക്ഷകരും അണ്‍ എയ്ഡഡ് സ്കൂളുകളിൽ നിന്നുള്ള അപേക്ഷകരും കൂടി ചേരുന്പോൾ കുട്ടികളുടെ എണ്ണം വീണ്ടും വർധിക്കും. ഹയർസെക്കൻഡറിയിൽ 61 സ്കൂളുകളിലായി 9,000 വും വിഎച്ച്എസ്ഇൽ 10 സ്കൂളുകളിലായി 840 ഉം ഐടിഐയിൽ മൂന്ന് ഇടങ്ങളിലായി 536 ഉം പോളി ടെക്നിക്കിൽ മൂന്ന് ഇടങ്ങളിലായി 660 ഉം സീറ്റുകളടക്കം ജില്ലയിൽ 11,036 സീറ്റുകളാണ് ആകെയുള്ളത്. ഇതിൽ ഐടിഐ, പോളി ടെക്നിക്ക് എന്നിവയിൽ മറ്റു കുട്ടികളടക്കം അപേക്ഷിക്കുന്പോൾ സീറ്റുകൾ ഗണ്യമായി കുറയും. വിദ്യാർഥികൾക്ക് താരതമ്യേന എളുപ്പമായിട്ടുള്ള മാനവിക വിഷയങ്ങളിൽ ജില്ലയിൽ ബാച്ചുകൾ കുറവാണ്. സംസ്ഥാന പ്രസിഡന്‍റ് കെ.കെ. സുധാകരൻ, ജില്ല ഭാരവാഹികളായ ശ്രീജിത്ത് വാകേരി, വി.ആർ. പ്രകാശ്, എൻ.വി. കരുണാകരൻ എന്നിവർ പ്രസംഗിച്ചു.

ജില്ലാ കളക്ടറുടെ ഓണ്‍ലൈൻ പരാതി പരിഹാര സെല്ലിന് തുടക്കമായി

കൽപ്പറ്റ: പൊതുജനങ്ങൾക്ക് ജില്ലാ കളക്ടറെ നേരിൽ കാണാതെ പരാതി പരിഹരിക്കാനുള്ള ഓണ്‍ലൈൻ പരാതി പരിഹാര സെല്ലിന് തുടക്കമായി. കളക്ടറേറ്റിൽ വരാതെ തന്നെ പൊതുജനങ്ങളുടെ പരാതി കളക്ടർക്ക് ലഭ്യമാക്കുന്നതാണ് പദ്ധതി. കളക്ടർ ഡി.ആർ. മേഘശ്രീ ഉദ്ഘാടനം നിർവഹിച്ചു. പൊതുജനങ്ങൾക്ക് സ്വന്തമായോ അക്ഷയ കേന്ദ്രങ്ങളിലൂടെയോ ഓണ്‍ലൈനായി അപേക്ഷാ നൽകാനും പരാതിയുടെ തൽസ്ഥിതി അറിയാനും സാധിക്കും. ജനങ്ങളുടെ ജോലി സമയം നഷ്ടപ്പെടുത്താതെ, ഓഫീസുകളിൽ കയറിയിറങ്ങാതെ പരാതി തീർപ്പുണ്ടാക്കാൻ സഹായകരമാകും വിധമാണ് പദ്ധതി ആവിഷ്കരിച്ചിരിക്കുന്നത്. ഓണ്‍ലൈൻ പോർട്ടലിൽ ലഭിക്കുന്ന പരാതികൾ ജില്ലാ കളക്ടർ നേരിട്ട് നിരീക്ഷിച്ച് ബന്ധപ്പെട്ട വകുപ്പുകളിലേയ്ക്ക് കൈമാറി ദ്രുതഗതിയിൽ നടപടികൾ സ്വീകരിക്കും. പൊതുജന പരാതി പരിഹാര സെൽ, ഐടി സെൽ, റവന്യു വകുപ്പ്, എൻഐസി, അക്ഷയ, ഐടി മിഷൻ എന്നീ വിഭാഗങ്ങൾ സംയുക്തമായാണ് പ്രവർത്തിക്കുന്നത്. ജില്ലാ കളക്ടറുടെ ചേംബറിൽ നടന്ന യോഗത്തിൽ പിജി സെൽ ജൂണിയർ സൂപ്രണ്ട് കെ. ഗീത, ഇൻഫർമാറ്റിക്സ് ഓഫീസർ ജസിം ഹാഫിസ്, ഐടി മിഷൻ ജില്ലാ പ്രോജക്ട് മാനേജർ എസ്. നിവേദ്, ഐടി സെൽ ഉദ്യോഗസ്ഥർ, ഇന്‍റേണ്‍സ് എന്നിവർ പങ്കെടുത്തു.

വികസന മുരടിപ്പിനു പരിഹാരമില്ലാതെ ചീക്കല്ലൂർ ഗ്രാമം

കൽപ്പറ്റ: വികസന മുരടിപ്പിനു പരിഹാരമില്ലാതെ കണിയാന്പറ്റ പഞ്ചായത്തിലെ ചീക്കല്ലൂർ ഗ്രാമം. പഞ്ചായത്തിലെ 3,17,18 വാർഡുകളുടെ ഭാഗങ്ങൾ ഉൾപ്പെടുന്ന ഗ്രാമത്തിൽ പദ്ധതികൾ പലതുണ്ടെങ്കിലും ജനങ്ങൾക്ക് ഉപകാരപ്പെടുന്നില്ല. പട്ടികവർഗത്തിൽപ്പെടുന്നതാണ് ഗ്രാമവാസികളിൽ അധികവും. ചീക്കല്ലൂരിൽ നടപ്പാക്കിയ പദ്ധതികളെല്ലാംതന്നെ പണം ധൂർത്തടിക്കാനുള്ള പരിപാടികളായി മാറിയെന്ന് ബിജെപി പഞ്ചായത്ത് കമ്മിറ്റി ഭാരവാഹികളായ വമ്മേരി രാഘവൻ, ഉണ്ണിക്കൃഷ്ണൻ ചീക്കല്ലൂർ, കെ. ബാബു മാരാർ, കെ.ജി. സുരേഷ്ബാബു എന്നിവർ വാർത്താസമ്മേളനത്തിൽ പറഞ്ഞു. ചീക്കല്ലൂരിൽ വരദൂർ പുഴയ്ക്കു കുറുകെ 1990ൽ ഒരു കോടിയിലേറെ രൂപ ചെലവഴിച്ച് നിർമിച്ച തടയണ നോക്കുകുത്തിയായി. ഗ്രാമത്തിലെ കരഭൂമിയിലും 200 ഏക്കർ വരുന്ന പാടത്തും ജലസേചനത്തിന് തടയണ ഉതകുമെന്നായിരുന്നു ജനങ്ങളുടെ പ്രതീക്ഷ. എന്നാൽ ഇതിനുള്ള യോഗം കർഷകർക്ക് ഉണ്ടായില്ല. ജലസേചനത്തിന് നിർമിച്ച രണ്ട് കുളങ്ങളുടെ നവീകരണത്തിന് കർഷകർ 2023 സെപ്റ്റംബറിൽ ജില്ലാ പഞ്ചായത്ത് കാര്യാലയത്തിലും ജില്ലാ കളക്ടർക്കും നിവേദനം നൽകിയെങ്കിലും ഫലം ഉണ്ടായില്ല. ഗ്രാമത്തിന്‍റെ വിവിധ ഭാഗങ്ങളെ സമീപത്തെ ടൗണുകളുമായി ബന്ധിപ്പിക്കുന്ന റോഡുകളെല്ലാം തകർന്നുകിടക്കുകയാണ്. ഇതി ശ്രദ്ധയിൽപ്പെടുത്തിയിട്ടും അധികൃതർക്കു കുലുക്കമില്ല. ഗ്രാമത്തിൽ കുടിവെള്ള വിതരണം രണ്ട് വർഷത്തിലധികമായി മുടങ്ങിയിരിക്കയാണ്. പതിറ്റാണ്ടുകൾ മുന്പ് ഇവിടെ ജപ്പാൻ കുടിവെള്ള പദ്ധതി നടപ്പാക്കിയിരുന്നു. പിന്നീട് അധികാരികൾ ജലനിധി പദ്ധതി കൊണ്ടുവന്നു. ഒരു കോടിയിൽപരം രൂപ ചെലവിൽ പണിത ജല ശുദ്ധീകരണ പ്ലാന്‍റ് പദ്ധതിയുടെ ഭാഗമായിരുന്നു. ഇപ്പോൾ ജൽജീവൻ പദ്ധതിയുമായാണ് അധികൃതർ മുന്നോട്ടുപോകുന്നത്. പദ്ധതി എപ്പോൾ പൂർത്തിയാകുമെന്നതിൽ നടത്തിപ്പുകാർക്കുപോലും തിട്ടമില്ലാത്ത സ്ഥിതിയാണ്. 1962ൽ ചീക്കല്ലൂരിൽ ആരംഭിച്ച ഗവ.എൽപി സ്കൂൾ യുപിയായി ഉയർത്തണമെന്ന മുറവിളി എങ്ങും എത്തുന്നില്ല. നാലാം ക്ലാസോടെ പഠനം നിർത്തുകയാണ് ഗ്രാമത്തിലെ പട്ടികവർഗ കുട്ടികളിൽ അധികവും. അഞ്ച് കിലോമീറ്റർ അകലെയാണ് യുപി സ്കൂൾ. വാഹന സൗകര്യം ഏർപ്പെടുത്തിയിട്ടും യുപി വിദ്യാഭ്യാസത്തിന് പോകുന്ന പട്ടികവർഗ കുട്ടികൾ കുറവാണ്. മഴക്കാലത്ത് ചോർന്നൊലിക്കുന്നതാണ് ചീക്കല്ലൂരിലെ പട്ടികവർഗ ഉന്നതികളിലുള്ള വീടുകളിൽ പലതും. ഇവ അറ്റകുറ്റപ്പണി നടത്തി വാസയോഗ്യമാക്കുന്നതിന് ഉത്തരവാദപ്പെട്ടവർക്ക് ശുഷ്കാന്തിയില്ല. ഗ്രാമത്തിലെ പടിഞ്ഞാറുവീട് ഉന്നതിയിൽ നിർമിച്ച കക്കൂസ് ടാങ്ക് നിറഞ്ഞ് മാലിന്യം പുറത്തേക്ക് തള്ളുകയാണ്. ഇത് ഉന്നതിയുള്ളവർക്കു പ്രയാസം സൃഷ്ടിക്കുന്നത് ചൂണ്ടിക്കാട്ടി ജില്ലാ കളക്ടർക്ക് പരാതി നൽകിയെങ്കിലും നടപടി ഉണ്ടാകുന്നില്ലെന്ന് ബിജെപി നേതാക്കൾ പറഞ്ഞു.

കൽപ്പറ്റ നഗരസഭയിൽ മഴക്കാലപൂർവ ശുചീകരണം തുടങ്ങി

കൽപ്പറ്റ: നഗരസഭയിൽ മഴക്കാലപൂർവ ശുചീകരണം തുടങ്ങി. നഗരസഭാപരിധിയിലെ തോടുകളും നീർച്ചാലുകളും നന്നാക്കുന്ന പ്രവൃത്തിയാണ് ആരംഭിച്ചത്. ഇതിന് തനതുഫണ്ടിലെ ഒന്പത് ലക്ഷം രൂപയാണ് ചെലവഴിക്കുന്നത്. നമ്മുടെ സ്വന്തം കൽപ്പറ്റന്ധഎന്ന പേരിൽ നടന്നുവരുന്ന നഗര സൗന്ദര്യവത്കരണ, മാലിന്യ സംസ്കരണ പ്രവർത്തനങ്ങളുടെ ഭാഗമായാണ് ശുചീകരണം. ചെയർമാൻ ടി.ജെ. ഐസക് ഉദ്ഘാടനം ചെയ്തു.ആരോഗ്യ സ്റ്റാൻഡിംഗ് കമ്മിറ്റി ചെയർമാൻ എ.പി. മുസ്തഫ, വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ സി.കെ, ശിവരാമൻ, മുനിസിപ്പൽ സെക്രട്ടറി അലി അഷ്കർ, കൗണ്‍സിലർമാരായ കെ. അജിത, പി. കുഞ്ഞുട്ടി, ക്ലീൻസിറ്റി മാനേജർ സത്യൻ, ഹെൽത്ത് ഇൻസ്പെക്ടർമാരായ സിറാജ്, സുനില, സജീവൻ, സൗമ്യ തുടങ്ങിയവർ സന്നിഹിതരായിരുന്നു.

സമഗ്ര ശുചീകരണ പ്രവർത്തനങ്ങളുമായി തരിയോട്

കൽപ്പറ്റ: മഴക്കാല പകർച്ചവ്യാധികൾ പിടിപെടാനുള്ള സാധ്യതകൾ ഒഴിവാക്കുക, നാടും നഗരവും ശുചിത്വപൂർണമായി നിലനിർത്തുക എന്നീ ലക്ഷ്യങ്ങളോടെ തരിയോട് ഗ്രാമപഞ്ചായത്തിന്‍റെ ആഭിമുഖ്യത്തിൽ മുഴുവൻ വാർഡുകളിലും സമഗ്ര ശുചീകരണ പരിപാടി സംഘടിപ്പിച്ചു. പരിപാടിയുടെ ഗ്രാമപഞ്ചായത്ത്തല ഉദ്ഘാടനം കാവുംമന്ദം ടൗണിൽ ഗ്രാമപഞ്ചായത്ത് പ്രസിഡന്‍റ് ഷമീം പാറക്കണ്ടി നിർവഹിച്ചു. വൈസ് പ്രസിഡന്‍റ് പുഷ്പ മനോജ് അധ്യക്ഷത വഹിച്ചു. ഗ്രാമപഞ്ചായത്ത് സ്ഥിരം സമിതി അധ്യക്ഷരായ ഷീജ ആന്‍റണി, രാധ പുലിക്കോട്, വി.ജി. ഷിബു, അംഗങ്ങളായ കെ.വി. ഉണ്ണികൃഷ്ണൻ, ചന്ദ്രൻ മടത്തുവയൽ, സൂന നവീൻ, ബീന റോബിൻസണ്‍, വിജയൻ തോട്ടുങ്കൽ, വത്സല നളിനാക്ഷൻ, സിബിൽ എഡ്വേർഡ്, കെ.എൻ. ഗോപിനാഥൻ, മെഡിക്കൽ ഓഫീസർ ഡോ. ദിവ്യകല, ഹെഡ് ക്ലർക്ക് ബിനീഷ് വർഗീസ്, ഹെൽത്ത് ഇൻസ്പെക്ടർമാരായ ടി. അശോകൻ, ഷെറിൻ സഹല, വിവിധ സ്ഥാപന മേധാവികൾ, ജീവനക്കാർ, കുടുംബശ്രീ, ഹരിതകർമ്മ സേന, നിർവഹണ ഉദ്യോഗസ്ഥർ, ഗ്രാമപഞ്ചായത്ത് ജീവനക്കാർ, അങ്കണവാടി ജീവനക്കാർ, തൊഴിലുറപ്പ് തൊഴിലാളികൾ, ആരോഗ്യ പ്രവർത്തകർ, ആശ വർക്കർമാർ, വ്യാപാരികൾ, മറ്റ് തൊഴിലാളികൾ, പൊതുജനങ്ങൾ തുടങ്ങിയവർ പങ്കാളികളായി.

അന്പലവയൽ മഞ്ഞപ്പാറ ഭൂമി ഇടപാട്: ലൂഥറൻ ചർച്ച് ട്രസ്റ്റ് പോലീസിൽ പരാതി നൽകി

കൽപ്പറ്റ: അന്പലവയൽ മഞ്ഞപ്പാറയിൽ ഇന്ത്യ ഇവാഞ്ചലിക്കൽ ലൂഥറൻ ചർച്ച് കൈവശംവച്ച് നികുതിയടച്ചുവരുന്ന 40 സെന്‍റ് ഭൂമിയുടെ വിൽപന വിവാദത്തിൽ. ഭൂമി 9.62 ലക്ഷം രൂപ വില നിശ്ചയിച്ച് രണ്ട് സ്വകാര്യ വ്യക്തികൾക്ക് ആധാരം ചെയ്തു നൽകിയത് അധികാരപ്പെട്ട വ്യക്തിയല്ലെന്നു കാണിച്ചും കുറ്റക്കാർക്കെതിരേ കർശന നടപടി ആവശ്യപ്പെട്ടും ലൂഥറൻ ചർച്ച് അധികൃതർ ജില്ലാ പോലീസ് മേധാവിക്കും അന്പലവയൽ പോലീസ് സ്റ്റേഷനിലും പരാതി നൽകി. ഭൂമി ആധാരം ചെയ്തു നൽകിയ കൊല്ലം നിലമേൽ ബംഗ്ലാംകുന്ന് എൽഎം കോന്പൗണ്ട് ഡാർവിൻ(60), ഭൂമി വാങ്ങിയ അന്പലവയൽ ഉരുളാംകുന്നത്ത് കെ.സി. കുഞ്ഞമ്മു(63), മകൻ അബ്ദുൾ സുജീദ്(36)തുടങ്ങിയവരെ എതിർകക്ഷികളാക്കിയാണ് പരാതി. 2025 മാർച്ച് 21നാണ് ഭൂമിയുടെ ആധാരം നടന്നത്. ഭൂമി എഴുതിക്കൊടുത്ത ഡാർവിൻ ഇവാഞ്ചലിക്കൽ ലൂഥർ ഇന്ത്യാ മിഷൻ പ്രോപ്പർട്ടീസ് ബോർഡ് ജനറൽ സെക്രട്ടറിയാണെന്നാണ് ആധാരത്തിൽ പറയുന്നത്. ഭൂമി വിൽപനയെക്കുറിച്ച് കഴിഞ്ഞ ദിവസം വിവരം ലഭിച്ചതിന്‍റെ അടിസ്ഥാനത്തിലാണ് ചർച്ച് അധികൃതർ പോലീസിനെ സമീപിച്ചത്. വിഷയത്തിൽ പോലീസ് അന്വേഷണം തുടങ്ങി. മഞ്ഞപ്പാറയിലെ ഭൂമിയുടെ വിൽപനയിലും ഇതുമായി ബന്ധപ്പെട്ട ഗൂഢാലോചനയിലും സമഗ്രാന്വേഷണം ആവശ്യമാണെന്ന് ചർച്ച് തിരുവനന്തപുരം സിനഡ് പ്രസിഡന്‍റ് ഡോ.മോഹനൻ മാനുവൽ, ട്രസ്റ്റ് ഡയറക്ടർ ഫാ.ജി. ജസ്റ്റിൻ രാജ്, ഫാ.ബി. ജോയി, നിലമേൽ സർക്കിൾ പ്രസിഡന്‍റ് ഫാ.എ.ടി. ബേബി, ചർച്ച് കൗണ്‍സിൽ അംഗം ഫാ.എസ്എസ്. ഒലിവർ, ഫാ.വി. വിപിൻ, ഫാ.മനുപ്രസാദ് എം,ഫാ.ജോണ്‍ ദാസ്, ഫാ.പ്രശാന്ത് രാജ് എന്നിവർ വാർത്താസമ്മേളനത്തിൽ പറഞ്ഞു. വയനാട്ടിലുള്ളതടക്കം സഭയുടെ വസ്തുക്കൾ ഇന്ത്യ ഇവാഞ്ചലിക്കൽ ലൂഥറൻ ചർച്ച് എന്ന പേരിൽ ചെന്നൈ രജിസ്ട്രേഷൻ ഓഫീസിൽ കന്പനി ആക്ട് പ്രകാരം രജിസ്റ്റർ ചെയ്തതാണ്. ട്രസ്റ്റിന്‍റെ പേരിലുള്ള വസ്തുക്കൾ ചെന്നൈ ഹൈക്കോടതിയുടെ അറിവോ സമ്മതമോ ഇല്ലാതെ വിൽപന നടത്താൻ ആർക്കും അധികാരമില്ല. സഭയുടെ വസ്തുക്കൾ തട്ടിയെടുക്കാൻ തത്പര കക്ഷികൾ ആസൂത്രിത നീക്കം വർഷങ്ങളായി നടത്തിവരികയാണ്. മീനങ്ങാടിയിൽ സഭയുടെ പേരിൽ 3.5 ഏക്കർ ഭൂമിയുണ്ട്. ഇവിടെ ഷോപ്പിംഗ് കോംപ്ല്സ് നിർമിക്കുന്നതു തടയാൻ ചിലർ ശ്രമിച്ചതായി ചർച്ച് അധികൃതർ പറഞ്ഞു.

ദുരന്ത ബാധിതരോടും തൊഴിലാളികളോടും അവഗണന: യുഡിഎഫ് കളക്ടറേറ്റ് മാർച്ച് നാളെ

കൽപ്പറ്റ: പുഞ്ചിരിമട്ടം ഉരുൾ ദുരന്തബാധിതരോടും തൊഴിലാളികളോടുമുള്ള സർക്കാരിന്‍റെ അവഗണനയിൽ പ്രതിഷേധിച്ച് നാളെ കളക്ടറേറ്റ് മാർച്ചും ധർണയും നടത്താൻ യുഡിഎഫ് നിയോജകമണ്ഡലം പ്രവർത്തക കണ്‍വൻഷൻ തീരുമാനിച്ചു. കാബിനറ്റ് തീരുമാനിച്ചിട്ടും പുഞ്ചിരിമട്ടം ദുരന്ത ബാധിതർക്ക് ദിനബത്ത ലഭിക്കുന്നില്ല. താത്കാലികമായി പുനരധിവസിപ്പിച്ചവർക്ക് വീട്ടുവാടക യഥാസമയം അനുവദിക്കുന്നില്ല. ടൗണ്‍ഷിപ്പിന് ഏറ്റെടുത്ത എൽസ്റ്റൻ എസ്റ്റേറ്റിലെ തൊഴിലാളികൾക്ക് ആനുകൂല്യം ലഭ്യമാക്കുന്നതിലും തൊഴിൽ സുരക്ഷ ഉറപ്പുവരുത്തുന്നതിലും നടപടി വൈകുകയാണ്. തൊഴിലാളികളെ ക്വാർട്ടേഴ്സുകളിൽനിന്നു ബലപ്രയോഗത്തിലൂടെ ഒഴിപ്പിക്കാൻ നീക്കം നടക്കുകയാണെന്നും കണ്‍വൻഷൻ ചൂണ്ടിക്കാട്ടി. ടി. സിദ്ദിഖ് എംഎൽഎ ഉദ്ഘാടനം ചെയ്തു. മുസ്ലിം ലീഗ് നിയോജകമണ്ഡലം ജനറൽ സെക്രട്ടറി സലിം മേമന അധ്യക്ഷത വഹിച്ചു. നിയോജകമണ്ഡലം യുഡിഎഫ് കണ്‍വീനർ പി.പി. ആലി, റസാഖ് കൽപ്പറ്റ, ടി. ജെ. ഐസക്, എം.എ. ജോസഫ്, ഒ.വി. അപ്പച്ചൻ, പോൾസണ്‍ കൂവക്കൽ, അലവി വടക്കേതിൽ, ശോഭനകുമാരി, ഗിരീഷ് കൽപ്പറ്റ, എൻ. മുസ്തഫ, ഉസ്മാൻ പഞ്ചാര, സലിം വൈത്തിരി എന്നിവർ പ്രസംഗിച്ചു. മാർച്ച് രാവിലെ 11ന് കെപിസിസി പ്രസിഡന്‍റ് സണ്ണി ജോസഫ് എംഎൽഎ ഉദ്ഘാടനം ചെയ്യും.

’അരങ്ങ്’ ജില്ലാതല കലോത്സവം തുടങ്ങി: ബത്തേരി സിഡിഎസ് മുന്നിൽ

കൽപ്പറ്റ: കുടുംബശ്രീ മിഷന്‍റെ നേതൃത്വത്തിൽ അയൽക്കൂട്ട ഓക്സിലറി ഗ്രൂപ്പ് അംഗങ്ങളുടെ കലാപരമായ കഴിവുകളെ ഉണർത്തുന്നതിനും പ്രകടിപ്പിക്കുന്നതിനും അവസരം ഒരുക്കുന്ന ജില്ലാതല കലോത്സവം ‘അരങ്ങ് 2025’ ന് തിരിതെളിഞ്ഞു. മീനങ്ങാടി സെന്‍റ് പീറ്റേഴ്സ് ആൻഡ് സെന്‍റ് പോൾസ് ഹൈസ്കൂളിൽ നടക്കുന്ന ദ്വിദിന കലോത്സവം ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ ഉദ്ഘാടനം ചെയ്തു. മീനങ്ങാടി ഗ്രാമപഞ്ചായത്ത് പ്രസിഡന്‍റ് ഇ.കെ. വിനയൻ അധ്യക്ഷത വഹിച്ചു. ആദ്യദിനം സ്റ്റേജിതര മത്സരങ്ങളും വിവിധ സ്റ്റേജ് ഇനങ്ങളും പൂർത്തിയാവുന്പോൾ 90 പോയിന്‍റുമായി ബത്തേരി സിഡിഎസ് ആണ് മുന്നിൽ. 23 പോയിന്‍റുമായി തവിഞ്ഞാൽ സിഡിഎസ് രണ്ടാമതും 17 പോയിന്‍റുമായി പനമരം സിഡിഎസ് മൂന്നാം സ്ഥാനത്തുമാണ്. 98 മത്സര ഇനങ്ങളിലായി ജില്ലയിലെ 27 സിഡിഎസുകളിൽ നിന്നും 500 ൽ അധികം മത്സരാർഥികളാണ് ജില്ലാ കലോത്സവത്തിന്‍റെ ഭാഗമാവുന്നത്. സുൽത്താൻ ബത്തേരി, മാനന്തവാടി, കൽപ്പറ്റ ബ്ലോക്ക് അടിസ്ഥാനത്തിൽ നടത്തിയ കലോത്സവത്തിലെ വിജയികളാണ് ജില്ലാ കലോത്സവത്തിൽ മാറ്റുരയ്ക്കുന്നത്. കുടുംബശ്രീ ജില്ലാ മിഷൻ കോഓർഡിനേറ്റർ പി.കെ. ബാലസുബ്രഹ്മണ്യൻ, ജില്ലാ പഞ്ചായത്ത് ഡിവിഷൻ അംഗം സിന്ധു ശ്രീധരൻ, മുട്ടിൽ ഗ്രാമപഞ്ചായത്ത് പ്രസിഡന്‍റ് ശ്രീദേവി ബാബു, പൊഴുതന ഗ്രാമപഞ്ചായത്ത് പ്രസിഡന്‍റ് അനസ് റോസ്ന സ്റ്റെഫി, മീനങ്ങാടി പഞ്ചായത്ത് വാർഡ് അംഗം ഉഷ രാജേന്ദ്രൻ, ജില്ലയിലെ വിവിധ സിഡിഎസ് ചെയർപേഴ്സണ്‍മാർ, എഡിഎംസിമാരായ എ.കെ. അമീൻ, വി.കെ. റജീന, എഡിഎംസി കെ.എം. സലീന എന്നിവർ പങ്കെടുത്തു.

വന്യജീവികളുടെ താവളമായി വേടൻകോട് എസ്റ്റേറ്റിലെ കാടുമൂടിയ ഭാഗം

ചീരാൽ: 300 ഏക്കർ വരുന്ന വേടൻകോട് എസ്റ്റേറ്റിലെ കാടുമൂടിയ ഭാഗം വന്യജീവികൾ താവളമാക്കി. പുലി, പന്നി, കാട്ടാട്, മയിൽ, കുരങ്ങ് തുടങ്ങിയ ഇനം വന്യജീവികൾ എസ്റ്റേറ്റിലെ ‘വനത്തിൽ’ തങ്ങുന്നുണ്ടെന്ന് പ്രദേശവാസികൾ പറയുന്നു. എസ്റ്റേറ്റിലെ മഞ്ഞക്കുന്ന് ഭാഗമാണ് കാടുമൂടിയത്. എസ്റ്റേറ്റിനടുത്താണ് കല്ലിങ്കര, മഞ്ഞക്കുന്ന്, തവണി, ചെറുമാട് തുടങ്ങിയ ജനവാസ കേന്ദ്രങ്ങൾ. ഇവിടങ്ങളിൽ വന്യജീവി ശല്യം കലശലാണ്. മഞ്ഞക്കുന്നിനടുത്ത് കഴിഞ്ഞദിവസം പുലിയെ കണ്ടതായി നാട്ടുകാർ പറയുന്നു. കാട് വെട്ടിത്തെളിക്കാൻ വേടൻകോട് എസ്റ്റേറ്റ് മാനേജ്മെന്‍റിന് നിർദേശം നൽകണമെന്ന് പ്രദേശവാസികളുടെ യോഗം റവന്യു അധികാരികളോട് ആവശ്യപ്പെട്ടു. എസ്റ്റേറ്റിലുള്ള വന്യജീവികളെ വനത്തിലേക്ക് തുരത്തണമെന്ന ആവശ്യവും ഉന്നിയിച്ചു. ജെ.എ. രാജു അധ്യക്ഷത വഹിച്ചു. കെ.സി.കെ. തങ്ങൾ, ടി. ഗംഗാധരൻ, വി.എസ്. സദാശിവൻ, സലിം നൂലക്കുന്ന്, ടി.എൻ. സുരേന്ദ്രൻ, എ. സലിം എന്നിവർ പ്രസംഗിച്ചു.

’നോക്ക് ഔട്ട് ഡ്രഗ്സ്’ ഫുട്ബോൾ കാർണിവൽ: കുപ്പാടിത്തറ കവല എഫ്സി ജേതാക്കൾ

മാനന്തവാടി: ലഹരിവിരുദ്ധ പ്രവർത്തനങ്ങളുടെ ഭാഗമായി ജില്ലാ പോലീസ് ’നോക്ക് ഔട്ട് ഡ്രഗ്സ്’ എന്ന പേരിൽ സംഘടിപ്പിച്ച ഫുട്ബോൾ കാർണിവലിൽ കുപ്പാടിത്തറ കവല എഫ്സി ജേതാക്കളായി. വള്ളിയൂർക്കാവ് ഗ്രൗണ്ടിൽ നടന്ന മത്സരത്തിൽ ഏകപക്ഷീയമായ ഒരു ഗോളിന് ട്രിപ്പിൾ സിക്സ് വൈത്തിരിയെയാണ് പരാജയപ്പെടുത്തിയത്. ബ്ലോക്കുതല മത്സരത്തിൽ ജേതാക്കളായ ടീമുകളാണ് ജില്ലാതല മത്സരത്തിൽ മാറ്റുരച്ചത്. കലാശക്കളി ഉദ്ഘാടനം പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു നിർവഹിച്ചു. കളികളിലും കലകളിലും സാമൂഹിക പ്രവർത്തനങ്ങളിലും ഏർപ്പെട്ടും മാതാപിതാക്കളെ സ്നേഹിച്ചുമാണ് ജീവിതത്തിൽ ലഹരി കണ്ടത്തേണ്ടതെന്ന് അദ്ദേഹം പറഞ്ഞു. ബ്ലോക്ക് പഞ്ചായത്ത് പ്രസിഡന്‍റ് ജസ്റ്റിൻ ബേബി അധ്യക്ഷത വഹിച്ചു. ജില്ലാ പോലീസ് മേധാവി തപോഷ് ബസുമതാരി ലഹരിവിരുദ്ധ സന്ദേശം നൽകി. റിട്ട.പോലീസ് സൂപ്രണ്ട് പ്രിൻസ് ഏബ്രഹാം, ജില്ലാ അഡീഷണൽ എസ്പി. ടി.എൻ. സജീവ്, സ്പെഷൽ ബ്രാഞ്ച് ഡിവൈഎസ്പി എം.എം. അബ്ദുൾ കരീം, നർകോടിക് സെൽ ഡിവൈഎസ്പി എം.കെ. ഭരതൻ, മാനന്തവാടി ഡിവൈഎസ്പി വി.കെ. വിശ്വംഭരൻ, ബത്തേരി ഡിവൈഎസ്പി അബ്ദുൾ ഷെരീഫ്, കൽപ്പറ്റ ഡിവൈഎസ്പി പി.എൽ. ഷൈജു, മാനന്തവാടി പോലീസ് ഇൻസ്പെക്ടർ അഗസ്റ്റിൻ, ബ്ലോക്ക് പഞ്ചായത്ത് അംഗം അസീസ് വാളാട്, വ്യാപാരി വ്യവസായി ഏകോപന സമിതി പ്രതിനിധി കെ. ഉസ്മാൻ, നഗരസഭാ കൗണ്‍സിലർ സുനിൽകുമാർ, അത്ലറ്റിക് അസോസിയേഷൻ ജില്ലാ സെക്രട്ടറി ലൂക്ക ഫ്രാൻസിസ്, ജനമൈത്രി നോഡൽ ഓഫീസർ കെ.എം. ശശിധരൻ, എസ്ഐ എം.കെ. സാദിർ എന്നിവർ പ്രസംഗിച്ചു. സമാപനച്ചടങ്ങിൽ മന്ത്രിയും ജില്ലാ പോലീസ് മേധാവിയും ചേർന്ന് ട്രോഫികൾ കൈമാറി. മത്സരത്തിൽ പങ്കെടുത്ത എല്ലാ ടീമുകളിലെയും അംഗങ്ങൾക്കു ലഹരിവിരുദ്ധ സന്ദേശമടങ്ങിയ സർട്ടിഫിക്കറ്റ് നൽകി. അണ്ടർ-20 സംസ്ഥാന ചാന്പ്യൻമാരായ വയനാട് ജില്ലാ ടീമും ജില്ലാ പോലീസ് ടീമും തമ്മിൽ സൗഹൃദ ഫുട്ബോൾ മത്സരം നടന്നു.

വഴിയോര വിശ്രമകേന്ദ്രം, വനിതാ സംരംഭക സമുച്ചയം: ശിലാസ്ഥാപനം നടത്തി

മാനന്തവാടി: ബ്ലോക്ക് പഞ്ചായത്ത് ജനകീയ ആസൂത്രണ പദ്ധതിയിൽ ഉൾപ്പെടുത്തി നിർമിക്കുന്ന വഴിയോര വിശ്രമകേന്ദ്രത്തിന്‍റെയും വനിതാ സംരംഭക സമുച്ചയത്തിന്‍റെയും ശിലാസ്ഥാപനം പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു നിർവഹിച്ചു. ബ്ലോക്ക് പഞ്ചായത്ത് പ്രസിഡന്‍റ് ജസ്റ്റിൻ ബേബി അധ്യക്ഷത വഹിച്ചു. നഗരസഭാ ചെയർപേഴ്സണ്‍ സി.കെ. രത്നവല്ലി, ബ്ലോക്ക് പഞ്ചായത്ത് വൈസ് പ്രസിഡന്‍റ് എ.കെ. ജയഭാരതി, എടവക പഞ്ചായത്ത് പ്രസിഡന്‍റ് അഹമ്മദുകുട്ടി ബ്രാൻ, തവിഞ്ഞാൽ പഞ്ചായത്ത് വികസന സ്റ്റാൻഡിംഗ് കമ്മിറ്റി ചെയർപേഴ്സണ്‍ ലൈജി തോമസ്, ജില്ലാ പഞ്ചായത്ത് അംഗങ്ങളായ കെ. വിജയൻ, മീനാക്ഷി രാമൻ, എ.എൻ. സുശീല, ബ്ലോക്ക് പഞ്ചായത്ത് വികസന സ്റ്റാൻഡിംഗ് കമ്മിറ്റി ചെയർമാൻ കെ.വി. വിജോൾ, ആരോഗ്യ-വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സണ്‍ പി. കല്യാണി, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ സൽമ മോയിൻ, പി. ചന്ദ്രൻ, ബ്ലോക്ക് പഞ്ചായത്ത് അസിസ്റ്റന്‍റ് എക്സിക്യുട്ടീവ് എൻജിനിയർ ദ്വൈരൈ സ്വാമി, ജോയിന്‍റ് ബിഡിഒ ആലി വള്ളി, തുടങ്ങിയവർ പങ്കെടുത്തു. വിനോദസഞ്ചാര വകുപ്പിന്‍റെ സഹകരണത്തോടെ 69 ലക്ഷം രൂപ ചെലവിലാണ് വഴിയോര വിശ്രമ കേന്ദ്രം(ടേക് എ ബ്രേക്ക്) ഒരുക്കുന്നത്. 69 ലക്ഷം രൂപ ചെലവിലാണ് വഴിയോര വിശ്രമ കേന്ദ്രം(ടേക് എ ബ്രേക്ക്) ഒരുക്കുന്നത്. നഗരത്തിന്‍റെ ഹൃദയഭാഗത്ത് 11.095 കോടി രൂപ ചെലവിലാണ് വനിതാ സംരംഭകർക്ക് പ്രത്യേക വിപണന സമുച്ചയം തയാറാക്കുന്നത്.

പുനരധിവാസം യുദ്ധകാലാടിസ്ഥാനത്തിൽ നടപ്പാക്കണം: സിപിഐ-എംഎൽ റെഡ്സ്റ്റാർ

കൽപ്പറ്റ: ദുരന്തബാധിതരുടെ വാടക കുടിശിക ഉടൻ വിതരണം ചെയ്യണമെന്നും ഭൂമിയേറ്റെടുക്കൽ വിദേശ ബിനാമി കന്പനി ഹാരിസണ്‍സും പിണറായി സർക്കാരും തമ്മിലുള്ള ഒത്തുകളി അവസാനിപ്പിക്കണമെന്നും സിപിഐ-എംഎൽ റെഡ്സ്റ്റാർ ജില്ലാ കമ്മിറ്റി ആവശ്യപ്പെട്ടു. കാലവർഷം വരാനിരിക്കെ മേപ്പാടി, വൈത്തിരി, പൊഴുതന അടക്കമുള്ള പരസ്ഥിതിലോല പഞ്ചായത്തുകളിൽ മണ്‍സൂണ്‍ ഷെൽട്ടറുകളുടെ നിർമാണം അടിയന്തിരമായി പൂർത്തിയാക്കമെന്നും ദുരന്തമേഖലയിലെ അർഹരായ മുഴുവൻ കുടുംബങ്ങളെയും പുരരധിവാസത്തിൽ ഉൾപ്പെടുത്തുകയും ചെയ്യണമെന്നും കമ്മിറ്റി ആവശ്യപ്പെട്ടു. ജില്ലാ സെക്രട്ടറി കെ.വി. പ്രകാശ് റിപ്പോർട്ട് അവതരിപ്പിച്ചു. പി.എം. ജോർജ്, പി.ടി. പ്രേമാനന്ദ്, ബിജി ലാലിച്ചൻ, എം.കെ. ഷിബു, കെ.ജി. മനോഹരൻ, സി.ജെ. ജോണ്‍സണ്‍ തുടങ്ങിയവർ പ്രസംഗിച്ചു.

കർഷക കോണ്‍ഗ്രസ് കൃഷിഭവൻ മാർച്ചും ധർണയും നടത്തി

കോട്ടത്തറ: കർഷക കോണ്‍ഗ്രസ് മണ്ഡലം കമ്മിറ്റിയുടെ നേതൃത്വത്തിൽ കൃഷിഭവൻ മാർച്ചും ധർണയും നടത്തി. കേര കർഷകർക്ക് കേന്ദ്ര സർക്കാർ അനുവദിച്ച തുക വകമാറ്റി ചെലവഴിക്കാനുള്ള നീക്കം സംസ്ഥാന സർക്കാർ ഉപേക്ഷിക്കുക, വരൾച്ച, പ്രകൃതിക്ഷോഭം, വന്യജീവി ശല്യം എന്നിവ മൂലം കൃഷി നശിച്ച കർഷകർക്കുള്ള നഷ്ടപരിഹാരം വിതരണം ചെയ്യുക, വന്യമൃഗശല്യത്തിനു ശാശ്വത പരിഹാരം കാണുക, സംഭരിക്കുന്ന നെല്ലിന്‍റെ വില സമയബന്ധിതമായി അനുവദിക്കുക, കർഷക പെൻഷൻ കൃത്യസമയം ലഭ്യമാക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു സമരം. ജില്ലാ വൈസ് പ്രസിഡന്‍റ് വി.ഡി. ജോസ് ഇരുളം ഉദ്ഘാടനം ചെയ്തു. മണ്ഡലം പ്രസിഡന്‍റ് പി.ജെ. ആന്‍റണി പാറയിൽ അധ്യക്ഷത വഹിച്ചു. കോണ്‍ഗ്രസ് മണ്ഡലം പ്രസിഡന്‍റ് സി.സി. തങ്കച്ചൻ, കർഷക കോണ്‍ഗ്രസ് ജില്ലാ കമ്മിറ്റിയംഗം സുധീഷ്കുമാർ ഇരുളം, ശാന്ത ബാലകൃഷ്ണൻ, വി.ഡി. സാബു, വി.ജെ. സ്റ്റീഫൻ, പി.കെ. ജോണ്‍ എന്നിവർ പ്രസംഗിച്ചു. വി.ഡി. രാജു സ്വാഗതവും പി.എൽ. അനീഷ് നന്ദിയും പറഞ്ഞു.

വയനാടിനെ അവഗണിച്ചതിനുള്ള മറുപടിയായിരിക്കും വരുന്ന തെരഞ്ഞെടുപ്പ്: ടി. സിദ്ദിഖ് എംഎൽഎ

കൽപ്പറ്റ: കേന്ദ്ര, സംസ്ഥാന സർക്കാരികളുടെ വയനാടിനോടുള്ള അവഗണനയ്ക്കെതിരേയുള്ള വിധിയെഴുത്തായിരിക്കും ഈ വർഷം നടക്കുന്ന തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പെന്നും കൽപ്പറ്റ നിയോജകമണ്ഡലത്തിൽ 10 പഞ്ചായത്തിലും ഒരു മുനിസിപ്പാലിറ്റിയിലും യുഡിഎഫ് മികച്ച വിജയം നേടി ഭരണം നേടുമെന്നും എംഎൽഎ പറഞ്ഞു. ചൂരൽമല, മുണ്ടക്കൈ ദുരിതബാധിതർക്കുള്ള വാടക കുടിശിക മുടങ്ങിക്കിടക്കുകയാണ്. ദുരിതബാധിതരുടെ ജീവനോപാതിക്കുള്ള യാതൊരു നടപടിയും കൈകൊണ്ടിട്ടില്ല. ടൗണ്‍ഷിപ്പ് ഭൂമിയായ കൽപ്പറ്റ എൽസ്റ്റൻ എസ്റ്റേറ്റിലെ തൊഴിലാളികളെ വഞ്ചിക്കുന്നതാണ് സർക്കാർ നിലപാട്. തൊഴിലാളികൾക്കുള്ള ക്ഷേമനിധി പെൻഷൻ 14 മാസമായി മുടങ്ങിക്കിടക്കുകയാണ്. ഈ സാഹചര്യത്തിലും ഇടതുപക്ഷ സർക്കാർ വാർഷികാഘോഷത്തിന്‍റെ പേര് പറഞ്ഞു കോടിക്കണക്കിന് രൂപ ധൂർത്തടിച്ചു മുന്നോട്ടു പോവുകയാണെന്നും അദ്ദേഹം കൂട്ടിച്ചേർത്തു. കൽപ്പറ്റ നിയോജകമണ്ഡലം കോണ്‍ഗ്രസ് കമ്മിറ്റിയുടെ നേതൃത്വത്തിൽ കെപിസിസിയുടെ ആഹ്വാനപ്രകാരം മിഷൻ 2025 എന്ന പേരിൽ തദ്ദേശസ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് മുന്നൊരുക്കത്തിന്‍റെ ഭാഗമായി സംഘടിപ്പിച്ച പരിശീലന ക്യാന്പ് ഉദ്ഘാടനം ചെയ്ത് പ്രസംക്കുകയായിരുന്നു അദ്ദേഹം. കെപിസിസി അംഗം പി.പി. ആലി അധ്യക്ഷത വഹിച്ചു. മുനിസിപ്പൽ ചെയർമാൻ ടി.ജെ. ഐസക്, വി.എ. മജീദ്, എം.എ. ജോസഫ്, ഒ.വി. അപ്പച്ചൻ, പോൾസണ്‍ കൂവക്കൽ, സംഷാദ് മരക്കാർ, എം.ജി. ബിജു, പി.കെ. അബ്ദുറഹിമാൻ, ബിനു തോമസ്, നജീബ് കരണി, നിസി അഹമ്മദ്, എൻ.സി. കൃഷ്ണകുമാർ, ശോഭന കുമാരി, മോയിൻ കടവൻ, പി. വിനോദ് കുമാർ, ഗിരീഷ് കൽപ്പറ്റ, ഒ.വി. റോയി, മുഹമ്മദ് ബാവ, ജോയ് തൊട്ടിത്തറ, ഷാജി വട്ടത്തറ, എബിൻ മുട്ടപ്പള്ളി, സി. സുരേഷ് ബാബു, എ.എ. വർഗീസ്, സി.സി. തങ്കച്ചൻ, എ.എ. വർഗീസ്, ചന്ദ്രിക കൃഷ്ണൻ, സി.എ. അരുണ്‍ദേവ്, ഹർഷൽ കോന്നാടൻ തുടങ്ങിയവർ പ്രസംഗിച്ചു.

കർഷകർ ക്ഷീരവൃത്തി നിർത്തുന്നു; കന്നുകാലി സന്പത്ത് കുറയുന്നു

കൽപ്പറ്റ: ഉത്പാദനച്ചെലവിന് ആനുപാതികമായ വരുമാനത്തിന്‍റെ അഭാവത്തിൽ സംസ്ഥാനത്ത് ക്ഷീരവൃത്തി അവസാനിപ്പിക്കുന്ന കർഷകരുടെ എണ്ണം വർധിക്കുന്നു. ഇത് കന്നുകാലി സന്പത്തിനെയും ബാധിക്കുകയാണ്. 2019ൽ സംസ്ഥാനത്ത് 13,41,996 കന്നുകാലികൾ ഉണ്ടായിരുന്നത് 2024ൽ 9,10,556 ആയി കുറഞ്ഞതായാണ് കണക്കുകൾ വ്യക്തമാക്കുന്നത്. നൂറുകണക്കിന് കുടുംബങ്ങൾ ഉപജീവനത്തിന് പശുവളർത്തലിനെ ആശ്രയിക്കുന്ന വയനാട്ടിൽ 2019ൽ 79,753 കന്നുകാലികൾ ഉണ്ടായിരുന്നത് 2024ൽ 58,439 ആയി കുറഞ്ഞു. മറ്റു ജില്ലകളിലും വ്യത്യസ്തമല്ല സ്ഥിതി. വയനാട് ഒഴികെ ജില്ലകളിൽ കന്നുകാലി സന്പത്തിലുണ്ടായ കുറവിന്‍റെ കണക്ക് (ജില്ല, 2019ലെ എണ്ണം, 2024ലെ എണ്ണം എന്ന ക്രമത്തിൽ): തിരുവനന്തപുരം: 98,822-74,453. കൊല്ലം: 1,10,542-71,568. പത്തനംതിട്ട: 61,157-39,264. ആലപ്പുഴ: 79,370-52,338. കോട്ടയം: 81,074-50,945. ഇടുക്കി: 97,396-56,444. എറണാകുളം: 1,08,06-66,691. തൃശൂർ: 1,11,932-73,685. പാലക്കാട്: 1,66,952-1,34,925. മലപ്പുറം: 87,035-63,327. കോഴിക്കോട്: 94,248-62,490. കണ്ണൂർ: 91,687-55,969. കാസർഗോഡ്: 73,968-50468. സംസ്ഥാനത്ത് പാലിനും മാംസത്തിനും ആടുകളെ വളർത്തുന്നവരുടെ എണ്ണവും കുറയുകയാണ്. 2019ൽ 14 ജില്ലകളിലുമായി 13,59,161 ആടുകൾ ഉണ്ടായിരുന്നത് 2024ൽ 7,99,027 ആയി കുറഞ്ഞു. വയനാട്ടിൽ പ്രവാസികളുടേതടക്കം നിരവധി ഫാമുകൾ ഏതാനും വർഷത്തിനിടെ പൂട്ടിയതായി മലബാർ ഡയറി ഫാർമേഴ്സ് അസോസിയേഷൻ ഭാരവാഹികളായ മത്തായി പുള്ളോർക്കുടി, കെ.സി. അന്നമ്മ, ലില്ലി മാത്യു, കെ.ജെ. മാർട്ടിൻ എന്നിവർ പറഞ്ഞു. പശുക്കൃഷി നിർത്തിയ ചെറുകിട കർഷകരുടെ എണ്ണം ആയിരക്കണക്കിനുവരും. അഞ്ച് വർഷം മുന്പുവരെ ജില്ലയിൽ കർഷക കുടുംബങ്ങളെല്ലാംതന്നെ ഒന്നും രണ്ടും പശുക്കളെ വളർത്തിയിരുന്നു. നിലവിൽ മിക്ക വീടുകളോടും ചേർന്നുള്ള തൊഴുത്ത് ശൂന്യമാണ്. കാലാവസ്ഥയിലെ പിഴവുകളും രോഗങ്ങളും കാർഷിക മേഖലയിൽ ഏൽപ്പിച്ച ആഘാതത്തെത്തുടർന്നുണ്ടായ സാന്പത്തികത്തകർച്ചയുടെ പശ്ചാത്തലത്തിൽ ജില്ലയിൽ ആയിരക്കണക്കിനു കർഷക കുടുംബങ്ങളാണ് പശുപരിപാലനം മുഖ്യ ഉപജീവനമാർഗമാക്കിയത്. ഇത് വയനാടൻ ഗ്രാമങ്ങളിൽ ക്ഷീര വിപ്ലവത്തിനു കാരണമായി. പ്രതിദിനം ശരാശരി 2,05,000 ലിറ്റർ പാൽ ക്ഷീരസംഘങ്ങൾ മുഖേന വയനാട് ഡയറിയിൽ സംഭരിച്ചിരുന്നു. 56 ക്ഷീര സംഘങ്ങൾ ജില്ലയിലുണ്ട്. 55 എണ്ണം ആപ്കോസ് വിഭാഗത്തിലും ഒരെണ്ണം(ബത്തേരി) പരന്പരാഗത വിഭാഗത്തിലുമുള്ളതാണ്. നിലവിൽ ഒരു ലിറ്റർ പാൽ ഉത്പാദിപ്പിക്കുന്നതിനു ശരാശരി 55 രൂപ ചെലവ് വരും. ക്ഷീരസംഘത്തിൽ അളക്കുന്ന പാൽ ലിറ്ററിന് 41 രൂപ വരെയാണ് കർഷകന് വില കിട്ടുന്നത്. ഏകദേശം 15 രൂപയാണ് ഒരു ലിറ്റർ പാൽ ഉത്പാദിപ്പിക്കുന്പോൾ നഷ്ടം. ഈ സാഹചര്യമാണ് ക്ഷീരവൃത്തിയിൽ ഏർപ്പെടുന്ന കർഷകരുടെ എണ്ണവും കന്നുകാലി സന്പത്തും കുറയുന്നതിന് മുഖ്യകാരണം. കർഷകരെ ക്ഷീര മേഖലയിൽ പിടിച്ചുനിർത്തുന്നതിന് പാൽ ലിറ്ററിന് 70 രൂപയെങ്കിലും വില ലഭ്യമാക്കേണ്ടതുണ്ടെന്ന് മലബാർ ഡയറി ഫാർമേഴ്സ് അസോസിയേഷൻ ഭാരവാഹികൾ പറഞ്ഞു. മിൽക്ക് ചാർട്ട് പുതുക്കണം. മൃഗാശുപത്രികളിൽ ലാബ് സൗകര്യം മെച്ചപ്പെടുത്തണം. മുഴുവൻ പശുക്കൾക്കും സൗജന്യ ഇൻഷ്വറൻസ് ഏർപ്പെടുത്തണം. മൃഗാശുപത്രികളിൽ ആവശ്യത്തിനു മരുന്നുകൾ ലഭ്യമാക്കണം. അത്യുത്പാദനശേഷിയുള്ള പശുക്കളെ സൃഷിക്കാൻ കഴിയുന്ന ബീജം സപ്ലൈ ചെയ്യണം. സബ്സിഡികൾ ക്ഷീരകർഷകരുടെ അക്കൗണ്ടിൽ നേരിട്ടു നൽകണം. ഇതെല്ലാം ക്ഷീര കർഷകർക്കു പ്രോത്സാഹനമാകുമെന്ന് അസോസിയേഷൻ ഭാരവാഹികൾ പറഞ്ഞു.

കേരള പോലീസ് അസോസിയേഷൻ ജില്ലാ കണ്‍വൻഷൻ

കൽപ്പറ്റ: കേരള പോലീസ് അസോസിയേഷൻ ജില്ലാ കണ്‍വൻഷൻ ഇന്ന് മുട്ടിൽ എംആർ ഓഡിറ്റോറിയത്തിൽ നടക്കും. പ്രതിനിധി സമ്മേളനം രാവിലെ 10ന് ജില്ലാ പോലീസ് മേധാവി തപോഷ് ബസുമതാരി ഉദ്ഘാടനം ചെയ്യും. അഡീഷണൽ എസ്പി ടി.എൻ. സജീവ്, കേരള പോലീസ് അസോസിയേഷൻ സംസ്ഥാന ജനറൽ സെക്രട്ടറി ഇ.വി. പ്രദീപൻ, സംസ്ഥാന ട്രഷറർ ജി.പി. അഭിജിത്ത്, ഡിവൈഎസ്പിമാരായ വി.കെ. വിശ്വംഭരൻ, പി.എൽ. ഷൈജു, കെ.കെ. അബ്ദുൾ ഷെരീഫ്, എം. എം. അബ്ദുൾ കരീം, കെപിഒഎ ജില്ലാ പ്രസിഡന്‍റ് എം.എ. സന്തോഷ്, സെക്രട്ടറി പി.സി. സജീവൻ, പോലീസ് സഹകരണ സംഘം പ്രസിഡന്‍റ് കെ.എം. ശശിധരൻ, കെപിഎ സംസ്ഥാന നിർവാഹക സമിതിയംഗം ജോർജ് നിറ്റസ് തുടങ്ങിയവർ പങ്കെടുക്കും. വൈകുന്നേരം ആറിന് കുടുംബസംഗമവും പൊതുസമ്മേളനവും പട്ടിക ജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു ഉദ്ഘാടനം ചെയ്യും. വിവിധ മേഖലകളിൽ കഴിവ് തെളിയിച്ചവരെ ആദരിക്കും. കലാസന്ധ്യ ഉണ്ടാകും.

ശ്വാസ്: ജില്ലാതല പരിശീലനം നടത്തി

കൽപ്പറ്റ: ആരോഗ്യ വകുപ്പ് നടത്തുന്ന ശ്വാസകോശ രോഗ പ്രതിരോധ, നിയന്ത്രണ പരിപാടിയായ ‘ശ്വാസി’ന്‍റെ ഭാഗമായി ജില്ലയിലെ മെഡിക്കൽ, പ്രോഗ്രാം ഉദ്യോഗസ്ഥർക്ക് പരിശീലനം നൽകി. തരിയോട് പരിശീലന കേന്ദ്രത്തിൽ ജില്ലാ മെഡിക്കൽ ഓഫീസർ ഡോ.ടി. മോഹൻദാസ് ഉദ്ഘാടനം ചെയ്തു. ഡെപ്യൂട്ടി ജില്ലാ മെഡിക്കൽ ഓഫീസർ ഡോ.ആൻസി മേരി ജേക്കബ്, എൻസിഡി നോഡൽ ഓഫീസർ ഡോ.കെ.ആർ. ദീപ, ജില്ലാ ടിബി ഓഫീസർ ഡോ.പ്രിയ സേനൻ, ആർദ്രം ജില്ലാ നോഡൽ ഓഫീസർ ഡോ.പി.എസ്. സുഷമ, ആർസിഎച്ച് ജില്ലാ ഓഫീസർ ഡോ.ജെറിൻ എസ്. ജെറോഡ്, ജില്ലാ എഡ്യുക്കേഷൻ ആൻഡ് മീഡിയ ഓഫീസർ കെ.എം. മുസ്തഫ എന്നിവർ പ്രസംഗിച്ചു. സ്പൈറോമെട്രി ഉപയോഗിച്ചുള്ള രോഗ നിർണയത്തെക്കുറിച്ച് ശ്വാസകോശ രോഗ വിദഗ്ധ ഡോ.എൻ.എച്ച്. ബബി ക്ലാസെടുത്തു. ശ്വാസകോശ രോഗങ്ങളുടെ നിർണയം, ചികിത്സ, പുനരധിവാസം, പുകവലി നിർത്താനുള്ള പരിപാടികൾ എന്നിവ ഉൾക്കൊള്ളുന്ന സമഗ്ര ആരോഗ്യ പരിപാടിയാണ് ശ്വാസ്.

കായിക മന്ത്രി കൃഷ്ണഗിരി ക്രിക്കറ്റ് സ്റ്റേഡിയം സന്ദർശിച്ചു

മീനങ്ങാടി: കായിക മന്ത്രി വി. അബ്ദുറഹ്മാൻ കൃഷ്ണഗിരി ക്രിക്കറ്റ് സ്റ്റേഡിയം സന്ദർശിച്ചു. ക്രിക്കറ്റ് കോച്ചിംഗ് ക്യാന്പ് സമാപന യോഗം അദ്ദേഹം ഉദ്ഘാടനം ചെയ്തു. ക്യാന്പിൽ പങ്കെടുത്ത കുട്ടികൾക്കുള്ള സർട്ടിഫിക്കറ്റ് വിതരണം ചെയ്ത മന്ത്രി ലഹരിവിരുദ്ധ സന്ദേശം നൽകി. ജില്ലാ ക്രിക്കറ്റ് അസോസിയേഷൻ പ്രസിഡന്‍റ് എം.കെ. അബ്ദുൾ സമദ് അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ, ജില്ലാ സ്പോർട്സ് കൗണ്‍സിൽ പ്രസിഡന്‍റ് എം. മധു, വൈസ് പ്രസിഡന്‍റ് സലിം കടവൻ, ജാഫർ സേട്ട്, എ.എം. നൂർഷ തുടങ്ങിയവർ പങ്കെടുത്തു. ജില്ലാ ക്രിക്കറ്റ് അസോസിയേഷൻ സെക്രട്ടറി നാസിർ മച്ചാൻ സ്വാഗതം പറഞ്ഞു.

ഹയർ സെക്കൻഡറി പരീക്ഷാവിജയികളെ അനുമോദിച്ചു

കയ്യൂന്നി: തമിഴ്നാട് ഹയർ സെക്കൻഡറി സ്കൂൾ പരീക്ഷയിൽ ഉന്നത വിജയം നേടിയ സേക്രഡ് ഹാർട്ട് മെട്രിക്കുലേഷൻ സ്കൂൾ വിദ്യാർഥികളെ മാനേജ്മന്‍റിന്‍റെയും പിടിഎയുടെയും സംയുക്ത യോഗം അനുമോദിച്ചു. സ്കൂൾ രക്ഷാധികാരി മാനന്തവാടി രൂപത മെത്രാൻ മാർ ജോസ് പൊരുന്നേടം അധ്യക്ഷത വഹിച്ചു. ബോർഡ് ചെയർമാൻ രൂപത സഹായമെത്രാൻ മാർ അലക്സ് താരാമംഗലം, സ്കൂൾ മാനേജർ ഫാ.ജോസ് കൊച്ചറയ്ക്കൽ, ലോക്കൽ മാനേജർ ഫാ.ജോണ്‍ പൊൻപാറയ്ക്കൽ, പ്രിൻിസപ്പൽ ഫാ.ജയ്സണ്‍ കള്ളിയാട്ട്, ബർസാർ ഫാ.അനീഷ് ആലുങ്കൽ, പിടിഎ പ്രസിഡന്‍റ് അഡ്വ.ഷിനോയ് വട്ടാലിൽ, അധ്യാപക പ്രതിനിധികൾ എന്നിവർ പ്രസംഗിച്ചു.

വസന്തോത്സവം: ഗൂഡല്ലൂരിൽ സുഗന്ധവ്യഞ്ജന പ്രദർശന മേള തുടങ്ങി

ഗൂഡല്ലൂർ: നീലഗിരി വസന്തോത്സവത്തിന്‍റെ ഭാഗമായി 11-ാമത് സുഗന്ധവ്യഞ്ജന പ്രദർശന മേള മോണിംഗ് സ്റ്റാർ സ്കൂൾ മൈതാനിയിൽ തുടങ്ങി. ടൂറിസം, കൃഷി വകുപ്പുകൾ, ജില്ലാ ഭരണകൂടം എന്നിവയുടെ സംയുക്താഭിമുഖ്യത്തിലാണ് മേള നടക്കുന്നത്. തമിഴ്നാട് സാമൂഹികക്ഷേമ മന്ത്രി എം.എസ്. സ്വാമിനാഥൻ ഉദ്ഘാടനം ചെയ്തു. ജില്ലാ കളക്ടർ ലക്ഷ്മി ഭവ്യതന്നീറു അധ്യക്ഷത വഹിച്ചു. മേള നാളെ സമാപിക്കും. കുരുമുളക്, ഗ്രാന്പു, ഏലക്ക, ജീരകം തുടങ്ങിയ സുഗന്ധവ്യഞ്ജനങ്ങൾ ഉപയോഗിച്ചുനിർമിച്ച കുന്നൂർ റെയിൽവേ സ്റ്റേഷൻ, ജെല്ലിക്കെട്ട് കാള, ചിത്രശലഭം മാതൃകകൾ, ഇന്ത്യൻ ഭൂപടം തുടങ്ങിയവ മേളയിൽ ഒരുക്കിയിട്ടുണ്ട്.

ബത്തേരിയിലെ എബിസി കേന്ദ്രം പ്രവർത്തനക്ഷമമാക്കുന്നു

സുൽത്താൻ ബത്തേരി: തെരുവ് നായകളുടെ എണ്ണം നിയന്ത്രിക്കുന്നതിന് നഗരത്തിൽ സ്ഥാപിച്ച എബിസി കേന്ദ്രം പ്രവർത്തനക്ഷമമാക്കുന്നു. അനിമൽ വെൽഫയർ ബോർഡ് ഓഫ് ഇന്ത്യയുടെ അംഗീകാരം ലഭിക്കുന്ന മുറയ്ക്ക് കേന്ദ്രത്തിന്‍റെ പ്രവർത്തനം തുടങ്ങും. അംഗീകാരത്തിന് അപേക്ഷ നൽകിയിട്ടുണ്ട്. കേന്ദ്രം കുറച്ചുകാലമായി പ്രവർത്തനരഹിതമായിരുന്നു. കേന്ദ്രത്തിന് ബ്ലോക്ക് പഞ്ചായത്ത് 60 ലക്ഷം രൂപ മുടക്കി കെട്ടിടവും അനുബന്ധ സൗകര്യം ഒരുക്കി. ഒരേസമയം രണ്ട് നായകളെ കേന്ദ്രത്തിൽ വന്ധ്യംകരിക്കാം. നായകളെ പാർപ്പിക്കുന്നതിന് കൂടുകൾ സജ്ജീകരിച്ചു. സെന്‍ററിൽ ഡോക്ടർ, പാരാമെഡിക്കൽ സ്റ്റാഫ്, ക്ലീനിംഗ് സ്റ്റാഫ്, ഡോഗ് കാച്ചേഴ്സ് എന്നിവരെ കരാർ അടിസ്ഥാനത്തിൽ നിയമിക്കും.

പാതിവില തട്ടിപ്പ്: വയനാട്ടിൽ ക്രൈംബ്രാഞ്ച് അന്വേഷണത്തിന് മന്ദഗതി

കൽപ്പറ്റ: പാതിവില തട്ടിപ്പുമായി ബന്ധപ്പെട്ട് വയനാട്ടിൽ ക്രൈംബ്രാഞ്ചിന് കൈമാറിയ കേസുകളിൽ അന്വേഷണത്തിന് മന്ദ്രഗതി. പകുതിവിലയ്ക്ക് സ്കൂട്ടർ, ലാപ്ടോപ്, ഗൃഹോപകരണങ്ങൾ എന്നിവ വാഗ്ദാനം ചെയ്ത് തട്ടിപ്പു നടത്തിയതിന് ജില്ലയിൽ രജിസ്റ്റർ ചെയത് എട്ട് എഫ്ഐആറുകളിൽ നാലെണ്ണമാണ് കഴിഞ്ഞ ഫെബ്രുവരിയിൽ ക്രൈംബ്രാഞ്ച് അന്വേഷണത്തിന് വിട്ടത്. 31 പരാതികൾ അടങ്ങുന്നതാണ് ഓരോ പ്രഥമ വിവര റിപ്പോർട്ടും. മാസങ്ങൾ കഴിഞ്ഞിട്ടും പരാതിക്കാരിൽ കുറച്ചുപേരുടെ മൊഴിയാണ് ക്രൈംബ്രാഞ്ച് എടുത്തത്. ജില്ലയിൽ പാതിവില ഇടപാടിൽ സന്നദ്ധ സംഘടനകൾ, അക്ഷയ കേന്ദ്രങ്ങൾ എന്നിവ മുഖേന 1,100ൽപരം വ്യക്തികളിൽനിന്നു അഞ്ച് കോടിയിൽപരം രൂപ തട്ടിയെടുത്തെന്നാണ് ജ്വാല സമരസമിതി ശേഖരിച്ച കണക്കുകൾ വ്യക്തമാക്കുന്നത്. വിമൻ ഓണ്‍ വീൽസ് പദ്ധതിയിൽ പാതിവിലയ്ക്ക് സ്കൂട്ടർ നൽകാമെന്ന് വിശ്വസിപ്പിച്ച് 780 ആളുകളിൽനിന്നു 4.29 കോടി രൂപയും ഗൃഹോപകരണങ്ങൾ വാഗ്ദാനം ചെയ്ത 90 പേരിൽനിന്നു 16.18 ലക്ഷം രൂപയും ലാപ്ടോപ് ലഭ്യമാക്കുമെന്നു പറഞ്ഞ് 55 വിദ്യാർഥികളിൽനിന്നു 16.98 ലക്ഷം രൂപയുമാണ് തട്ടിയെടുത്തതെന്ന് ജ്വാല സമര സമിതി ഭാരവാഹികളായ നാസിർ പാലൂർ, ജോയ്സി ജോണ്‍, സിബി മണ്ടാട്, അനീറ്റ് ബൈജു, വിസ്മയ സജി, ജസീല സാജിർ, പി.ടി. ഹമീദ് എന്നിവർ പറഞ്ഞു. കൽപ്പറ്റ ആസ്ഥാനമായി പ്രവർത്തിക്കുന്ന സന്നദ്ധ സംഘടന മുഖേന സ്കൂട്ടറിനും മറ്റും പണം നൽകി തട്ടിപ്പിന് ഇരകളായവർ രൂപീകരിച്ചതാണ് ജ്വാല സമര സമിതി. കൽപ്പറ്റയിലെ സന്നദ്ധ സംഘടന മുഖേന 630 പേരാണ് തട്ടിപ്പിന് ഇരകളായത്. ഇവരിൽപ്പെട്ട 23 പേരിൽനിന്നാണ് ക്രൈംബ്രാഞ്ച് ഇതിനകം മൊഴിയെടുത്തത്. നഷ്ടപ്പെട്ട പണം തിരികെ ലഭ്യമാക്കണമെന്ന ആവശ്യവുമായി ജ്വാല സമര സമിതി അധികാരികൾക്ക് പരാതി നൽകുകയും കളക്ടറേറ്റ് മാർച്ച് ഉൾപ്പെടെ സമരങ്ങൾ നടത്തുകയും ചെയ്തിരുന്നു. രണ്ടാംഘട്ട സമരത്തിന്‍റെ ഭാഗമായി നാളെ രാവിലെ 10ന് മുണ്ടേരിയിൽ പ്രതിഷേധ സംഗമം നടത്തുമെന്ന് സമര സമിതി ഭാരവാഹികൾ പറഞ്ഞു. സംഗമം ഉദ്ഘാടനം ടി. സിദ്ദിഖ് എംഎൽഎ നിർവഹിക്കും. പണം കൈപ്പറ്റിയ എൻജിഒകളും അക്ഷയ കേന്ദ്രം നടത്തിപ്പുകാരും ഓരോ വ്യക്തിയും അടച്ച പണത്തിന്‍റെയും ഈ തുക കൈമാറ്റം ചെയ്ത അക്കൗണ്ടുകളുടെയും വിശദവിവരം പ്രസിദ്ധപ്പെടുത്തണമെന്ന് സമിതി ഭാരവാഹികൾ ആവശ്യപ്പെട്ടു.

ദുരന്തബാധിതർക്ക് ഫിലോകാലിയ ഫൗണ്ടേഷൻ നിർമിച്ച വീടുകൾ കൈമാറി

പുൽപ്പള്ളി: പുഞ്ചരിമട്ടം ഉരുൾ ദുരന്ത ബാധിതർക്ക് ഫിലോകാലിയ ഫൗണ്ടേഷൻ രണ്ടാം ഘട്ടത്തിൽ നിർമിച്ച 11 വീടുകളുടെ താക്കോൽദാനവും 21 വീടുകളുടെ രേഖ കൈമാറ്റവും സീതാമൗണ്ടിൽ പ്രതിപക്ഷ നേതാവ് വി.ഡി. സതീശൻ നിർവഹിച്ചു. ഫൗണ്ടേഷന്‍റെ പ്രവർത്തനം മാതൃകാപരമാണെന്ന് അദ്ദേഹം പറഞ്ഞു. പരിമിതികൾ മറികടന്ന് മനോഹര ഭവനങ്ങളാണ് ഫൗണ്ടേഷൻ ദുരന്തബാധിതർക്ക് നിർമിച്ചത്. ഫൗണ്ടേഷന്‍റെ പ്രവർത്തനം മറ്റു പ്രസ്ഥാനങ്ങൾക്ക് പ്രചോദനമാകട്ടെയെന്ന് പ്രതിപക്ഷ നേതാവ് പറഞ്ഞു. ഐ.സി. ബാലകൃഷ്ണൻ എംഎൽഎ അധ്യക്ഷത വഹിച്ചു. ഫൗണ്ടേഷൻ ചെയർമാൻ മാരിയോ ജോസഫ്, ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ, പനമരം ബ്ലോക്ക് പഞ്ചായത്ത് പ്രസിഡന്‍റ് ഗിരിജ കൃഷ്ണൻ, മുള്ളൻകൊല്ലി പഞ്ചായത്ത് പ്രസിഡന്‍റ് പി.കെ. വിജയൻ, ഡിസിസി പ്രസിഡന്‍റ് എൻ.ഡി. അപ്പച്ചൻ, മുസ്ലിംലീഗ് ജില്ലാ സെക്രട്ടറി ടി. മുഹമ്മദ്, റെജി ഓലിക്കരോട്ട്, ഫാ.കെ.കെ. വർഗീസ് എന്നിവർ പ്രസംഗിച്ചു. ഉരുൾ ദുരന്തബാധിതർക്ക് ജില്ലയിൽ ആദ്യം വീടുകൾ നിർമിച്ച് കൈമാറിയത് ഫിലോകാലിയ ഫൗണ്ടേഷനാണ്. കൂട് പദ്ധതിയിൽ 100 ദിവസംകൊണ്ടാണ് ഭവന പദ്ധതിയുടെ ആദ്യഘട്ടം പൂർത്തിയാക്കിയത്. സീതാമൗണ്ടിൽ 13 ഉം പെരിക്കല്ലൂരിൽ നാലും അന്പലവയലിൽ മൂന്നും ജില്ലയിൽ മറ്റിടങ്ങളിൽ നാലും വീടുകളാണ് ഫൗണ്ടേഷൻ നിർമിച്ചു നൽകുന്നത്.

അവകാശങ്ങളെക്കുറിച്ച് ജില്ലയിലെ സ്ത്രീകളിൽ അവബോധം കുറവ്: വനിതാ കമ്മീഷൻ അധ്യക്ഷ

കൽപ്പറ്റ: അവകാശങ്ങളെക്കുറിച്ച് ജില്ലയിലെ സ്ത്രീകളിൽ അവബോധം കുറവാണെന്ന് സംസ്ഥാന വനിതാ കമ്മീഷൻ അധ്യക്ഷ അഡ്വ.പി. സതീദേവി. കളക്ടറേറ്റിൽ അദാലത്തിൽ സംസാരിക്കുകയായിരുന്നു അവർ. ഇതര പ്രദേശങ്ങളെ അപേക്ഷിച്ച് കമ്മീഷന് ജില്ലയിൽനിന്നു ലഭിക്കുന്ന പരാതികൾ കുറവാണ്. പരാതികളിൽ ഭൂരിഭാഗവും ഗാർഹിക പീഡനം സംബന്ധിച്ചാണ്. ഭാര്യാഭർത്താൻമാർ തമ്മിലുള്ള കലഹങ്ങൾ കൂടുതലായും കൗമാരക്കാരായ കുട്ടികളെയാണ് ബാധിക്കുന്നത്. വയോധികരായ സ്ത്രീകളെ സംരക്ഷിക്കാത്തത് സംബന്ധിച്ച പരാതികൾ കമ്മീഷന് ലഭിക്കുന്നുണ്ടെന്നും ചെയർപേഴ്സണ്‍ പറഞ്ഞു. അദാലത്തിൽ പരിഗണിച്ച 22 പരാതികളിൽ രണ്ടെണ്ണം തീർപ്പാക്കി. 16 എണ്ണം അടുത്ത അദാലത്തിലേക്ക് മാറ്റി. നാല് പരാതികളിൽ പോലീസ് റിപ്പോർട്ട് തേടി. കമ്മീഷൻ അംഗം അഡ്വ.പി. കുഞ്ഞായിഷ, കൗണ്‍സിലർമാരായ ഷിനു ജോർജ്, റിയ റോസ്, സാമൂഹികനീതി വകുപ്പ് കൗണ്‍സലർ എം.എം. റീന എന്നിവരുംപങ്കെടുത്തു.

കണ്ണീർക്കയം നീന്തിക്കയറി വെളളാർമലയുടെ വിജയം

കൽപ്പറ്റ: പുഞ്ചിരിമട്ടം ഉരുൾ ദുരന്തത്തിൽ തകർന്ന വെള്ളാർമല ഗവ.സ്കൂൾ വിദ്യാർഥികൾ കണ്ണീർക്കയം നീന്തിക്കയറി എസ്എസ്എൽസി പരീക്ഷയിൽ ഉജ്വല വിജയം നേടി. താത്കാലികമായി മേപ്പാടിയിലേക്ക മാറ്റിയ വിദ്യാലയത്തിൽ പരീക്ഷ എഴുതിയ 55 പേരും വിജയിച്ചു. ഒരാൾ എല്ലാ വിഷയങ്ങളിലും ഫുൾ എ പ്ലസ് നേടി. ദുരന്തത്തിൽ നാടും ഉറ്റവരും നഷ്ടമായതിന്‍റെ വേവലാതികളിൽനിന്നു പതിയെയാണ് കുട്ടികൾ സാധാരണ ജീവിതത്തിലേക്ക് തിരികെ എത്തിയത്. മേപ്പാടിയിലെയും സമീപ പ്രദേശങ്ങളിലെയും താത്കാലിക പുനരധിവാസ ക്യാന്പുകളിൽനിന്നാണ് കുട്ടികൾ വിദ്യാലയത്തിയിരുന്നത്. ഉരുൾ ദുരന്തം നടന്ന് 33-ാമത്തെ ദിവസമാണ് മേപ്പാടിയിൽ വെള്ളാർമല സ്കൂൾ തുറന്നുപ്രവർത്തിച്ചത്.

ചരിത്ര വിജയം സമ്മാനിച്ചത് കൂട്ടായ പ്രവർത്തനം: ജില്ലാ പഞ്ചായത്ത് പ്രസിഡന്‍റ്

കൽപ്പറ്റ: എസ്എസ്എൽസി പരീക്ഷാഫലത്തിൽ സംസ്ഥാനതലത്തിൽ വയനാട് ആറാം സ്ഥാനത്തെത്തിയത് കൂട്ടായ പ്രവർത്തനത്തിന്‍റെ ഫലമാണെന്നും ഇതിനു പരിശ്രമിച്ച എല്ലാവരേയും അഭിനന്ദിക്കുന്നതായും ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ പറഞ്ഞു. ചരിത്രത്തിൽ ആദ്യമായി ജില്ലയ്ക്ക് ഏറ്റവും മികച്ച സ്ഥാനമാണ് ലഭിച്ചത.് ഒന്പത് വർഷം തുടർച്ചയായി 14-ാം സ്ഥാനത്തായിരുന്ന ജില്ല കഴിഞ്ഞവർഷം 13-ാം സ്ഥാനത്തായിരുന്നു. ഉരുൾ ദുരന്തം ഉൾപ്പെടെ അതിജീവിച്ചാണ് വയനാട്ടിലെ കുട്ടികൾ ചരിത്രവിജയം നേടിയതെന്നും സംഷാദ് പറഞ്ഞു.

എസ്എസ്എൽസി: വയനാട്ടിൽ 99.5 ശതമാനം വിജയം

കൽപ്പറ്റ: എസ്എസ്എൽസി പരീക്ഷയിൽ ജില്ലയിൽ 99.59 ശതമാനം വിജയം. വിവിധ വിദ്യാലയങ്ങളിൽ പരീക്ഷയ്ക്കിരുന്ന 11,640 വിദ്യാർഥികളിൽ 11,592 പേർ തുടർ പഠനത്തിന് അർഹത നേടി. സംസ്ഥാനതലത്തിൽ ആറാം സ്ഥാനത്തേക്ക് ജില്ലയുടെ വിജയ ശതമാനം ഉയർന്നു. 457 ആണ്‍കുട്ടികളും 940 പെണ്‍കുട്ടികളും അടക്കം 1,397 കുട്ടികൾ എല്ലാ വിഷയങ്ങളിലും എ പ്ലസ് നേടി. ജില്ലയിലെ 47 ഗവ.സ്കൂളുകളിൽ 100 ശതമാനമാണ് വിജയം. 19 എയ്ഡഡ് സ്കൂളുകളിലും ആറ് അണ്‍ എയ്ഡഡ് വിദ്യാലയങ്ങളിലും നൂറുമേനി വിളഞ്ഞു. പരീക്ഷയെഴുതിയ 5,788 ആണ്‍കുട്ടികളിൽ 5,759 ഉം 5,851 പെണ്‍കുട്ടികളിൽ 5,833 ഉം പേർ ലക്ഷ്യം കണ്ടു. ഏറ്റവും കൂടുതൽ കുട്ടികൾ എ പ്ലസ് നേടിയത് പിണങ്ങോട് ഡബ്ല്യുഒഎച്ച്എസ്എസിലാണ്. പരീക്ഷയെഴുതിയ 360 കുട്ടികൾ 86 പേർ മുഴുവൻ വിഷയങ്ങളിലും എ പ്ലസ് നേടി. ബത്തേരി അസംപ്ഷൻ സ്കൂളിൽ 290 പേർ പരീക്ഷയെഴുതിയതിൽ 68 പേർക്ക് മുഴുവൻ വിഷയങ്ങളിലും എ പ്ലസ് ലഭിച്ചു. മാനന്തവാടി എംജിഎം സ്കൂളിൽ പരീക്ഷയെഴുതിയ 105 കുട്ടികളിൽ 65 പേർ മുഴുവൻ വിഷയങ്ങളിലും എ പ്ലസ് നേടി.ജില്ലയിലെ എല്ലാ മോഡൽ റസിഡൻഷ്യൽ സ്കൂളുകളും നൂറ് ശതമാനം വിജയം നേടി. പൂക്കോട് ഏകലവ്യ മോഡൽ റസിഡൻഷ്യൽ സ്കളിലാണ് ഏറ്റവും കൂടുതൽ കുട്ടികൾ പരീക്ഷയെഴുതിയത്. 60 വിദ്യാർഥികളിൽ നാല് പേർ മുഴുവൻ വിഷയങ്ങളിലും എ പ്ലസ് നേടി. നൂറുശതമാനം വിജയം നേടിയ സർക്കാർ സ്കൂളുകൾ. പരീക്ഷ എഴുതിയ വിദ്യാർഥികളുടെ എണ്ണം ബ്രാക്കറ്റിൽ: വാളാട് ജിഎച്ച്എച്ച്എസ്(93), മാനന്തവാടി ജിവിഎച്ച്എസ്എസ്(339), തൃശിലേരി ജിഎച്ച്എസ്എസ്(76), ആറാട്ടുതറ ജിഎച്ച്എസ്(51), നീർവാരം ജിഎച്ച്എസ്(66), കാക്കവയൽ ജിഎച്ച്എസ്എസ്(224), അച്ചൂർ ജിഎച്ച്എസ്എസ്(84), കൽപ്പറ്റ ജിവിഎച്ച്എസ്എസ്(153), കരിങ്കുറ്റി ജിവിഎച്ച്എസ്എസ്(47), പടിഞ്ഞാറത്തറ ജിഎച്ച്എസ്എസ്(264), വെള്ളാർമല ജിവിഎച്ച്എസ്എസ് (55), പെരിക്കല്ലൂർ ജിഎച്ച്എസ് (70), ഇരുളം ജിഎച്ച്എസ് (74), ചേനാട് ജിഎച്ച്എസ് (32), വടുവൻചാൽ ജിഎച്ച്എസ്എസ്(229), വാകേരി ജിഎച്ച്എസ്(95), മീനങ്ങാടി ജിഎച്ച്എസ്എസ്(354), ബത്തേരി ജിഎസ്വിഎച്ച്എസ്എസ്(129), ഓടപ്പള്ളം ജിഎച്ച്എസ് (47), പനങ്കണ്ടി ജിഎച്ച്എസ്എസ്(77), അന്പലവയൽ ജിവിഎച്ച്എസ്എസ് (242), കല്ലർ ജിഎച്ച്എസ്(101), പനമരം ജിഎച്ച്എസ്(271), നല്ലൂർനാട് എഎംഎംആർ ജിഎച്ച്എസ്എസ് (34), നൂൽപ്പുഴ ആർജിഎം എച്ച്എസ്എസ്(35), എടത്തന ജിടിഎച്ച്എസ്(37), കൽപ്പറ്റ ജിഎംആർഎസ്(35), പൂക്കോട് ജിഎംആർഎസ്(60), തരുവണ ജിവിഎച്ച്എസ്(193), തിരുനെല്ലി ഗവ.ആശ്രമം സ്കൂൾ(41), പരിയാരം ജിഎച്ച്എസ്എസ് (50), മാതമംഗലം ജിഎച്ച്എസ് മാതമംഗലം(52), കാപ്പിസെറ്റ് ജിഎച്ച്എസ് (71), പേര്യ ജിഎച്ച്എസ്(82), തോൽപ്പെട്ടി ജിഎച്ച്എസ്(61), വാളേരി ട്രൈബൽ എച്ച്എസ് (38), വാളവയൽ ജിഎച്ച്എസ് (33), നെല്ലാറച്ചാൽ ജിഎച്ച്എസ് (50), അതിരാറ്റുകുന്ന് ജിഎച്ച്എസ് (28), കുപ്പാടി ജിഎച്ച്എസ് (76), വാരാന്പറ്റ ജിഎച്ച്എസ് (81), കുറുന്പാല ജിഎച്ച്എസ് (40), റിപ്പണ്‍ ജിഎച്ച്എസ് (75), പുളിഞ്ഞാൽ ജിഎച്ച്എസ്(61), തേറ്റമല ജിഎച്ച്എസ് (52), ബീനാച്ചി ജിഎച്ച്എസ് (117), ചീരാൽ ജിഎംഎച്ച്എസ് (196). എയ്ഡഡ് സ്കൂളുകൾ: ദ്വാരക എസ്എച്ച്എച്ച്എസ്എസ്(440), കല്ലോടിസെന്‍റ് ജോസഫ്സ് എച്ച്എസ്എസ്(189), പയ്യന്പള്ളി എസ്‌സി എച്ച്എസ്എസ് (145), നടവയൽ സെന്‍റ് തോമസ് എച്ച്എസ് (154), തൊണ്ടർനാട് എംടിഡിഎംഎച്ച്എസ് (244), പിണങ്ങോട് ഡബ്ല്യുഒഎച്ച്എസ്എസ് (360), തരിയോട് നിർമല എച്ച്എസ് (319), കൽപ്പറ്റ എസ്കഐംജെ എച്ച്എസ്എസ് (245), മുട്ടിൽ ഡബ്ല്യുഒവിഎച്ച്എസ്എസ് (335), ഏച്ചോം സർവോദയ എച്ച്എസ് (181), പള്ളിക്കുന്ന് എൽഎംഎച്ച്എസ് (64), അരപ്പറ്റ സിഎംഎസ് എച്ച്എസ് (69), മേപ്പാടി സെന്‍റ് ജോസഫ്സ് എച്ച്എസ്എസ് (137), മുള്ളൻകൊല്ലി സെന്‍റ് മേരീസ് എച്ച്എസ്എസ് (138), വേലിയന്പം ഡിവിവി എച്ച്എസ്എസ് (62), കല്ലുവയൽ ജയശ്രീ എച്ച്എസ്എസ് (108), കബനിഗിരി നിർമല എച്ച്എസ്എസ് (76), പൂതാടി എസ്എൻഎച്ച്എസ്എസ് (161), ബത്തേരി അസംപ്ഷൻ എച്ച്എസ് (112). അണ്‍ എയ്ഡഡ് സ്കൂളുകൾ: അന്പുകുത്തി എംജിഎം എച്ച്എസ്എസ് (105), കൽപ്പറ്റഎൻഎസ്എസ്ഇഎംഎച്ച്എസ്എസ്(76), മീനങ്ങാടി എസ്പി ആൻഡ് എസ്പി എച്ച്എസ്എസ് (33), ബത്തേരി സെന്‍റ് ജോസഫ്സ് ഇഎച്ച്എസ്എസ് (103), പനമരം ക്രസന്‍റ് പബ്ലിക് സ്കൂൾ (108), പൂമല സെന്‍റ് റോസല്ലോസ് ഇഗ്ലീഷ് സ്കൂൾ(8).

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]